La polizia chantunala dal Grischun ha a partir d'immediat ina nova polizista e 15 novs polizists. Venderdi avantmezdi èn els vegnids brevetads en in rom festiv en la sala dal cussegl grond a Cuira. Suenter la scolaziun da basa rinforzan els ussa il corp da polizia chantunal.

Ina dunna e 15 umens han absolvì durant in onn la scola da polizia ad Amriswil (TG) ed èn gia stads activs – en il rom d'in praticum – durant intginas emnas en il chantun Grischun. A partir dal 1. d'october 2014 fan els ussa uffizialmain part da la polizia chantunala dal Grischun – cun tut ils dretgs e cun tut las obligaziuns ch'il servetsch da polizia cuntegna. Las empermischuns correspundentas sin la bandiera dal Grischun han els fatg durant la festa da brevetaziun. Ultra da las confamigliaras e dals confamigliars da las persunas brevetadas èn sa participadas er numerusas represchentantas e numerus represchentants da la politica e da l'administraziun sco er d'organisaziuns partenarias a la festa. La festa da brevetaziun è vegnida enramada musicalmain – sco ch'igl è tradiziun – da la musica da la polizia dal Grischun.

Per la segirezza da la populaziun
Il cumandant da la polizia chantunala dal Grischun, colonel Walter Schlegel, ha accumpagnà ils absolvents da la scola da polizia durant l'entir onn da scolaziun. Per el èsi impurtant d'emprender ad enconuscher sia nova collavuratura e ses novs collavuraturs. Igl è stà in giavisch spezial dad el da raiver l'emprim di da scolaziun ensemen cun la scola da polizia sin la senda dal Pinut.
En vista al mintgadi da lavur che suonda ussa, ha Schlegel appellà a sia nova collavuratura ed a ses novs collavuraturs da reagir da tut temp ed er en situaziuns difficilas en moda persvadenta. "Intgins dals polizists ch'èn vegnids brevetads avant in onn èn vegnids clamads en acziun suenter 6 dis da lavur per dumagnar ina situaziun particulara (rapiment d'ostagis en in nightclub a Zizers). Els han stuì dar dumogn ad ina sfida speziala." Cun questa acziun hajan els rimnà entaifer curt temp dapli experientschas che bleras e blers da lur collegas da lavur che lavuran gia dapi blers onns tar la polizia, ha accentuà Schlegel. L'entir corp da polizia stoppia adina esser conscient dal fatg ch'el saja engaschà per la segirezza da la populaziun.

Dapli che suttascriver in contract da lavur
Il cusseglier guvernativ Christian Rathgeb ha gratulà a la nova polizista ed als novs polizists che han fatg cun success lur examen final. Il schef dal departament da giustia, segirezza e sanadad ha punctuà che far l'empermischun d'uffizi saja bler dapli che suttascriver in contract da lavur. La saramentaziun saja in ritual uffizial, tradiziunal, cun il qual vegnia sigillada ina relaziun da lavur e da confidenza fitg speziala. Il directur da la polizia ha explitgà plinavant che – cun prender giu l'empermischun d'uffizi – surdettia la populaziun a las polizistas ed als polizists il monopol da pussanza. Quest mussament da confidenza saja collià cun cundiziuns, numnadamain ch'ils meds impundids na vegnian mai duvrads cunter ils interess dal stadi, mabain per proteger il corp e la vita da tut la populaziun, per mantegnair la quietezza, la segirezza e l'urden, per garantir la convivenza paschaivla e l'egualitad giuridica sco er per defender la constituziun e las leschas.
 

La nova collavuratura ed ils novs collavuraturs
e lur emprim lieu da staziunament a partir dal 1. d'october 2014

• Aebli Flury, post da polizia d'Arosa
• Agnello Marco, post da polizia da Martina
• Dejanović Danijel, basa da la polizia da traffic da Tusaun
• Denoth Anita, post da polizia da Puschlav
• Gruber Fabio, post da polizia da Landquart
• Gujan Simon Luca, post da polizia da San Murezzan
• Hermann Jon, post da polizia da San Murezzan
• Herzog Dominik, post da polizia da Mesauc
• Joos Marco, basa da la polizia da traffic da Tusaun
• Manetsch Franco, post da polizia da Roveredo
• Rudolf Mischa, post da polizia da Castasegna
• Scherer Christoph, post da polizia d'Arosa
• Stecher Riccardo, post da polizia da San Murezzan
• Thomann Riccardo, basa da la polizia da traffic da Tavau
• Vetsch Andrea Roberto, post da polizia da Puschlav
• Wasescha Michael, basa da la polizia da traffic da Silvaplauna