Las bellezzas da la cuntrada e la diversitad da la natira caracteriseschan il Grischun. Spira natira porscha en spezial il parc naziunal svizzer. Quest reservat natiral da var 170 kilometers quadrat sa chatta en Engiadina ed en Val Müstair ed attira mintga onn 150'000 visitadras e visitaders.

Il parc naziunal svizzer ha ina spessa populaziun d'animals selvadis gronds indigens: Var 1900 tschiervs, 1700 chamutschs, 300 capricorns e 6 pèrs d'evlas. Dapi l'onn 1991 han er puspè tschess barbets chattà là lur spazi da viver natiral.

Quest reservat natiral d'ina grondezza da var 170 kilometers quadrat sa chatta en Engiadina ed en Val Müstair sin in'autezza tranter 1'400 e stgars 3'200 m.s.m. Il parc naziunal è vegnì fundà uffizialmain l'onn 1914. Sia natira vegn protegida cumplettamain da tut las influenzas ed intervenziuns umanas. Il parc naziunal è l'object da perscrutaziuns scientificas las pli differentas. Ultra da quai ha el ina gronda impurtanza sco territori da viandar impressiunant e recreativ.

Sco emprim vegn la protecziun da la natira

 50 pertschient da la surfatscha dal parc consista da guaud e da prada alpina, l'autra mesadad da grips e da gondas. Cun bunamain 2300 m.s.m. sa chatta il cunfin dal guaud en il parc sin in'autezza extraordinaria. Durant il temp ideal da visita tranter il zercladur e l'october viandeschan mintga onn circa 150'000 persunas sin ina rait da sendas da totalmain circa 80 kilometers. Tranter il Fuorn, Stabelchod e Margunet han ins ultra da quai creà ina senda didactica da biologia. Ils guardians dal parc procuran che las reglas ch'èn vegnidas fixadas per proteger la natira vegnian observadas. Els èn er adina gugent pronts da dar infurmaziuns. Il center d'infurmaziun e d'administraziun sa chatta en il nov center dal parc naziunal a Zernez.