Per il 1. da schaner 2008 han la confederaziun ed ils chantuns introducì la nova concepziun da la gulivaziun da finanzas e da la repartiziun da las incumbensas – la NGF svizra. Questa refurma federalistica cumplessiva è vegnida acceptada dal pievel svizzer en la votaziun constituziunala dals 28 da november 2004 cun 64.4% da las vuschs. Cun 68.8% da las vuschs ha il pievel grischun sustegnì anc pli cleramain quest project. La NGF svizra porta avantatgs considerabels, en spezial: 

• dapli effizienza en connex cun l'adempliment da las incumbensas
• decisiuns che resguardan meglier ils basegns da las burgaisas e dals burgais
• damain differenzas tranter ils chantuns
• clera indemnisaziun da grevezzas spezialas dals chantuns che n'èn betg influenzablas

La NGF svizra na mida dentant betg la gulivaziun da finanzas e la repartiziun da las incumbensas entaifer il chantun Grischun. Perquai exista in grond ed urgent basegn d'agir per noss chantun. Nus stuain concepir dal tuttafatg da nov nossa gulivaziun da finanzas – ch'è daventada fitg cumplitgada en il fratemp – sco er l'entretschament finanzial spess tranter il chantun e las vischnancas. La necessitad per questa refurma intrachantunala è sa mussada gia a chaschun da l'elavuraziun da la NGF svizra. In'adattaziun conscienziusa da la gulivaziun da finanzas vertenta entaifer il chantun sco er da la repartiziun da las incumbensas tranter il chantun e las vischnancas è alura vegnida empermessa en il rom dal project federal. Nossas structuras finanzialas grischunas èn antiquadas e na correspundan betg pli a la situaziun svizra. Per la refurma intrachantunala è vegnì elavurà sapientivamain in project separà – la NGF grischuna. La NGF grischuna s'orientescha fermamain vi dal project naziunal. Mo uschia sa fan valair cumplainamain ils avantatgs dal nov federalissem svizzer er en noss chantun.