La praschun dal Sennhof e las partiziuns da mesa-praschunia a la Wagnergasse a Cuira ed a Silvaplauna servan a l'execuziun da chastis e da mesiras da dunnas e dad umens tenor il cudesch penal svizzer e tenor il cudesch civil svizzer.

L'execuziun dal chasti sto promover il cumportament social da la praschuniera e dal praschunier, en spezial l'abilitad da viver senza chasti. L'execuziun dal chasti sto correspunder uschè bain sco pussaive a las relaziuns generalas da vita, garantir l'assistenza da la praschuniera u dal praschunier, cumbatter consequenzas nuschaivlas da la privaziun da la libertad e tegnair quint commensuradamain da la protecziun dal public, dal persunal d'execuziun sco er da las cumpraschunieras e dals cumpraschuniers (art. 75 al. 1 CP). Plinavant serva la praschun dal Sennhof a la collocaziun da persunas, per las qualas èn vegnidas ordinadas – en il rom mesiras repressivas en il dretg da persunas estras – mesiras che priveschan da la libertad (fermanza curta, arrest preparatoric, arrest d'expulsiun, arrest pervia d'insubordinaziun sco er arrest d'expulsiun pervia da l'inobservanza da l'obligaziun da cooperar en cas da la procuraziun da lur documents). (Art. 73 ss. da la lescha federala davart las persunas estras [LEst, CS 142.20] en cumbinaziun cun l'art. 27 da l'ordinaziun tar la lescha introductiva tar la legislaziun davart las persunas estras e davart ils fatgs d'asil [ORtLItLEA; DG 618.110]).

Gruppas en mira (categorias da praschunieras e da praschuniers)

I pon vegnir collocadas las suandantas categorias da praschunieras e da praschuniers: 

• chastis da praschun e da chasaforz 
• arrest d'inquisiziun ed arrest da segirezza 
• arrest d'extradiziun 
• arrest preparatoric ed arrest d'expulsiun 
• mesa-praschunia 
• mesiras penalas fin tar la collocaziun definitiva en praschun tras l'autoritad d'execuziun cumpetenta 
• en cas urgents: persunas collocadas tras in'autoritad tutelara u tras arrest da polizia (a curta vista)