I. Las autoritads da surveglianza dal stadi civil
A) En general
1. Confederaziun
Il stadi civil è chaussa da la confederaziun. L'autoritad federala da surveglianza è l'uffizi dal stadi civil che fa part dal departament federal da giustia e polizia.
2. Chantun
Mintga chantun sto nominar sia atgna autoritad da surveglianza. En questa funcziun ha l'uffizi da fatgs da polizia e da dretg civil dal Grischun la surveglianza dals uffizis da stadi civil dal Grischun. El sto prender tut quellas disposiziuns e dar tut quels cumonds che l'ordinaziun federala davart il stadi civil surdat a l'autoritad chantunala da surveglianza.
B) Servetschs ed incumbensas
1. Noss servetschs
- Survegliar e garantir la qualitad
- Documents esters
- Controllar ils documents dal stadi civil en la procedura da preparaziun per la maridaglia e per la registraziun dal partenadi da medema schlattaina sco er controllar la renconuschientscha d'uffants cun participaziun da burgaisas e da burgais esters
- Dar la permissiun da prender invista dals registers da stadi civil
- Ordinar la rectificaziun e l'extincziun d'inscripziuns en il register civil
Surveglianza e garanzia da la qualitad
L'uffizi instruescha las persunas che lavuran en il servetsch da stadi civil e fa regularmain inspecziuns dals registers da stadi civil en ils singuls uffizis da stadi civil.
Documents esters
L'uffizi examinescha ils documents e dispona l'inscripziun da cas da stadi civil ch'èn succedids a l'exteriur.
Examinaziun dals documents da stadi civil
En cas da las proceduras da preparaziun per la maridaglia e per la registraziun dal partenadi da medema schlattaina sco er en cas da las proceduras da renconuschientscha cun participaziun da burgaisas e da burgais esters che vegnan fatgas en il chantun Grischun è l'uffizi cumpetent per far la controlla dals documents esters.
2. Nossas incumbensas
- Instruir e scolar las persunas che lavuran en il servetsch da stadi civil
- Instituir novas funcziunarias e novs funcziunaris da stadi civil en l'uffizi
- Far inspecziuns dals uffizis da stadi civil
- Controllar las proceduras da preparaziun per la maridaglia e per la registraziun dal partenadi da medema schlattaina sco er controllar la renconuschientscha d'uffants cun participaziun da burgaisas e da burgais esters
- Disponer l'inscripziun da documents esters en il register da stadi civil
- Ordinar la rectificaziun e l'extincziun d'inscripziuns en il register civil
- Conceder la permissiun da prender invista dals registers da stadi civil
II. L'uffizi da stadi civil
A) En general
L'uffizi da stadi civil è il post da consultaziun per las burgaisas e per ils burgais. En il chantun Grischun è l'uffizi da stadi civil suttamess organisatoricamain als circuls u - en cas da plirs circuls - a la cumissiun ch'è cumpetenta per tals.
B) La funcziunaria u il funcziunari da stadi civil
Dapi il 1. da fanadur 2004 vegnan ils uffizis da stadi civil manads en moda professiunala. Ina premissa per questa lavur è il certificat professiunal federal per funcziunarias e per funcziunaris da stadi civil. Per vegnir admessa u admess a l'examen professiunal, vegnan premess 2 onns pratica en il sectur dal stadi civil. I vegn recumandà da frequentar il curs da basa avant che cumenzar cun la lavur pratica e da frequentar il curs preparatoric avant che absolver l'examen professiunal. Il titel "funcziunaria da stadi civil cun diplom federal" u "funcziunari da stadi civil cun diplom federal" ch'ins survegn è protegì ed autorisescha da manar independentamain in uffizi da stadi civil.
C) Ils registers da stadi civil
La funcziunaria u il funcziunari da stadi civil è cumpetent per documentar publicamain il stadi civil d'ina persuna (naschientscha, mort, lètg, partenadi registrà e renconuschientscha) sco er per manar il stadi da famiglia ed il dretg da burgais. Fin l'onn 2003 èn vegnids manads registers da palpiri per quest intent. En il fratemp èn ils registers da palpiri vegnids remplazzads d'ina banca da datas electronica (infostar).
Tras la banca da datas electronica infostar èn tut ils registers da stadi civil da la Svizra colliads in cun l'auter. La confederaziun maina ina banca da datas centrala per ils chantuns; la registraziun da las datas vegn fatga vinavant en moda decentrala en ils singuls chantuns.
D) Extracts dals registers da stadi civil
Attests da naschientscha, da mort, da lètg e da renconuschientscha sco er documents da legitimaziun davart il partenadi registrà ston vegnir retratgs tar l'uffizi da stadi civil dal lieu da l'eveniment, quels davart il stadi civil e davart las relaziuns da famiglia (attest da stadi civil, scrit d'origin, certificat da famiglia, attest davart il stadi da famiglia registrà) tar l'uffizi da stadi civil dal lieu d'origin / dal lieu da burgais.