Mandats d'arrest publics da temps passads, documents istorics, unifurmas ed armas veglias e las pli novas, ma er perditgas dals cas criminals sensaziunals dals ultims onns èn exponids en il museum da la polizia grischuna. Bleras illustraziuns e blers objects raquintan chaussas plain tensiun, chaussas commoventas e divertentas e chaussas tragicas da l'istorgia da passa 200 onns da la polizia chantunala grischuna. Utensils d'infracturs, armas d'assassinats u valischs plainas da daners fauss, fotografias da lieus dal delict e fastizs fan regurdar ad acts criminals che han procurà da lur temp per grondas agitaziuns. Il gir tras il museum da la polizia grischuna mussa er cleramain il svilup rasant dal traffic sin via. Dumondas davart meds narcotics vegnan decleradas detagliadamain en in local spezial. En moda impressiunanta vegn mussà co ch'i sa furman incendis, tge consequenzas ch'els han e co ch'els pon vegnir evitads. En il "kino da la polizia" pon ins a la fin seser cumadaivlamain e s'infurmar davart l'istorgia e l'organisaziun da la polizia chantunala grischuna.