Model directiv  

Post da stab per l'egualitad da las schanzas

 

Dapi l'instituziun dal post da stab per l'egualitad da las schanzas l'onn 1996 renconuscha il chantun Grischun l'egualitad da dunna ed um. Cun quest post cumbatta el la discriminaziun pervia da la schlattaina e s'engascha per meglras schanzas da svilup e per dapli pussaivladads da tscherna per mattas e per mats, per dunnas e per umens en il Grischun. La via vers l'egualitad è in process che sto vegnir percurrì da las dunnas e dals umens communablamain.

Il chantun e las vischnancas s'engaschan per l'egualitad da las schanzas per tuts, spezialmain per l'egualitad da dunna ed um. Uschia statti en l'artitgel 75 alinea 2 da la constituziun chantunala.

Sco center da cumpetenza central dal chantun Grischun è il post da stab cumpetent per promover, per realisar e per garantir l'egualitad da dunna ed um e l'egualitad da las schanzas en tut ils secturs da la vita.

  • El elavura las infurmaziuns da basa, meglierescha la basa da las datas ed evaluescha ils resultats pertutgant ils deficits da l'egualitad da las schanzas en il chantun Grischun. Ils resultats da sia evaluaziun vegnan publitgads.
  • El integrescha enconuschientschas spezialisadas dal sectur da l'egualitad da las schanzas en las fatschentas, en ils projects ed en las proceduras da legislaziun da l'administraziun chantunala ed el sviluppa concepts, strategias ed instruments concrets en ils secturs politics che han effects externs.
  • El è in post public da documentaziun e da cussegliaziun per tut ils aspects da l'egualitad da las schanzas ed el promova l'infurmaziun e la sensibilisaziun da l'entira populaziun per dumondas da l'egualitad da dunna ed um.
  • El promova e sustegna ina politica da persunal orientada a l'egualitad da las schanzas tranter las collavuraturas ed ils collavuraturs da l'administraziun chantunala.
  • El è participà a las posiziuns ed a las consultaziuns davart projects chantunals e federals ch'èn relevants per l'egualitad da dunna ed um.
  • El fa part da tut las raits regiunalas, naziunalas ed internaziunalas che s'occupan da l'egualitad da las schanzas e da l'egualitad da dunna ed um.