Il chantun Grischun s'engascha per l'extensiun da plattafurmas electronicas. Il egovernment vul facilitar il traffic tranter interpresas ed autoritads sco er tranter persunas privatas ed autoritads, tras quai ch'il chantun porscha ses servetschs d'internet da tuttas uras en moda effizienta e cun ina qualitad irreproschabla. Sco emprim pass è vegnì mess en funcziun gia l'atun 2007 in nov portal per interpresas. En in'egliada chattan las interpresas là infurmaziuns e purschidas impurtantas en in urden tematic. En in segund pass èn las paginas d'internet dals departaments e dals posts da servetsch da l'administraziun chantunala vegnidas unifitgadas sin ina plattafurma communabla. Plinavant è vegnì mess sin la rait in portal per persunas privatas. Uschia è vegnida stgaffida la basa per ina cumparsa unitara e per ina integraziun directa dals servetschs.
Il chantun prevesa da trair a niz successivamain il potenzial dal egovernment. Per quest intent duain vegnir realisads en l'avegnir – en accordanza cun la strategia naziunala dad egovernment – ulteriurs novs servetschs electronics e purschidas online, sco p.ex. la votaziun electronica.