La dretgira administrativa consista per la perioda d’uffizi currenta (2009 – 2012) da tschintg derschadras e derschaders en uffizi cumplain. Sco ulteriuras persunas giudizialas lavuran quatter actuaras u actuars ordinaris. Per las fatschentas administrativas procura ina chanzlia da trais persunas. En detagl èn adossadas las suandantas incumbensas a las differentas funcziuns:

La dretgira cumplessiva
La dretgira cumplessiva ademplescha sias incumbensas tenor l’art. 14 LOG, ella surveglia tenor l’art. 21 LExp (DG 803.100) las cumissiuns d’expropriaziun, ademplescha las incumbensas tenor l’art. 2 ss. LItPMC en connex cun il post da mediaziun e la dretgira da cumpromiss tenor il dretg federal d’assicuranza sociala ed elegia las cumissiuns da dretgira per la durada da la perioda d’uffizi. Plinavant surpiglia ella las ulteriuras incumbensas tenor l’art 1. ODA. La dretgira cumplessiva suttastat a la presidenta u al president.

Instrucziun
Ils commembers da la dretgira preparan ils cas sco derschadras e derschaders d’instrucziun per mauns da las tschintg chombras da dretgira, mainan las tractativas da quellas e suttascrivan ensemen cun l'actuara u l’actuar las sentenzas ed ils conclus. Els sentenzieschan ultra da quai en ils cas segund l’art. 43 al. 3 LOG sco derschadras singulas e derschaders singuls. Ultra da quai relaschan els disposiziuns processualdirectivas e da stritgada.La dretgira instruescha ils cas tenor la suandanta repartiziun:

Ulteriur dretg administrativ e da procedura
president Schmid

Taglias e taxas
vicepresident Priuli

Dretg da planificaziun territoriala
derschader Meisser

AVS/AD/LPP/LAA/ulteriur dretg d'assicuranza sociala
derschadra Moser

LAI/LAMal/LAM
derschader Stecher

Exclus da questa repartiziun èn ils cas da lingua taliana che vegnan instruids da vicepresident Priuli resp. da derschader Stecher, en cas d’impediment da vicepresident Priuli. Ils cas rumantschs vegnan instruids da derschader Stecher ed - en cas d'impediment - da derschadra Moser. Ultra da quai ha la dretgira la cumpetenza da far excepziuns da la repartiziun surmenziunada per garantir in'atgna chargia equilibrada. En cas da recusaziun d'in commember da la dretgira vala la suandanta regla da substituziun: Schmid vegn remplazzà da Priuli, Priuli vegn remplazzà da Stecher, Stecher vegn remplazzà da Moser, Moser vegn remplazzada da Meisser e Meisser vegn remplazzà da Schmid.

L'actuariat
Las actuaras ed ils actuars prendan part cun vusch consultativa a las sedutas da las chombras e redigian las sentenzas sin fundament dals resultats da las tractativas per la sentenza u tenor instrucziun da la derschadra singula u dal derschader singul.

La chanzlia
La chanzlia liquidescha las lavurs administrativas tenor ordinaziun da la dretgira.

Cumpetenzas administrativas pli impurtantas
Las cumpetenzas administrativas las pli impurtantas sco la constituziun interna, l'elecziun da las actuaras e dals actuars e dal schef da chanzlia, l'approvaziun dal rapport annual ed il decretar directivas pertutgan il champ d'incumbensas da la dretgira cumplessiva. Ellas èn fixadas en l’ordinaziun da dretgira correspundenta (ODA, DG 173.300).

La cumissiun administrativa
La cumissiun administrativa sa cumpona dal presidi e d’ina ulteriura derschadra u d’in ulteriur derschader. Ella è responsabla per la preparaziun da las elecziuns per mauns da la dretgira cumplessiva, per elecziuns, per tut las dumondas da dretg dal persunal e da salarisaziun e per ulteriuras fatschentas da l'administraziun giudiziala.
Cumposiziun 2009 - 2012: Schmid, Priuli, Meisser

La cumissiun da publicaziun
La cumissiun da publicaziun sa cumpona d’ina derschadra u d’in derschader e da dus actuars u actuaras ed è responsabla per la publicaziun da la giurisdicziun da la dretgira en la PDA ed en l’Internet.
Cumposiziun 2009 - 2012: Meisser, Krättli-Keller, Passini

La cumissiun d’informatica
a cumissiun d’informatica sa cumpona d’ina derschadra u d’in derschader e da dus actuars u actuaras. Ella garantescha l’informatisaziun da la dretgira ed exequescha en il rom dal budget approvà tut las fatschentas correspundentas.
Cumposiziun 2009 - 2012: Priuli, Zürn, Krättli-Keller

Praticantas e praticants
A la dretgira administrativa obtegnan dus praticants u praticantas mintgamai per sis mais l'occasiun da sa scolar detagliadamain.

Actuaras ed actuars ad hoc
Tut tenor basegn vegnan engaschadas ulteriuras actuaras ed ulteriurs actuars ad hoc.

Post da mediaziun DAS
Sco mediatur dal post da mediaziun tenor il dretg federal d’assicuranza sociala è en uffizi dr. iur. Christian Schreiber, Cuira, e sco ses substitut dr. iur. Martin Schmid, Cuira.

Dretgira da cumpromiss DAS
Sco president da la dretgira da cumpromiss tenor il dretg federal d’assicuranza sociala è en uffizi dr. iur. Urs Meisser, Monstein, e sco ses substitut lic. iur. Agostino Priuli, Cuira.