Sco spazi natiral e cultural multifar ha il Grischun fascinà ed inspirà gia da vegl ennà tant scienziadas e scienziads sco er perscrutadras e perscrutaders. Cun instituts da perscrutaziun da renum internaziunal, cun scolas autas e cun scolas professiunalas superiuras dispona il Grischun d'ina vasta purschida en il sectur da la furmaziun e da la perscrutaziun.
En il Grischun contribueschan las purschidas da studi da las scolas autas e da las scolas professiunalas superiuras sco er la lavur da perscrutaziun da differentas instituziuns renumadas essenzialmain a l'attractivitad dal chantun sco lieu economic. Tras sias colliaziuns naziunalas ed internaziunalas han las studentas ed ils students da la Svizra e da l'exteriur la pussaivladad d'absolver in studi u da collavurar a projects da perscrutaziun en in ambient interessant.
Studegiar en la citad da las Alps
A Cuira, en la chapitala chantunala, sa chattan la scola auta spezialisada dal Grischun, la scola auta teologica sco er la scola auta da pedagogia. En ils secturs da la tecnica, da l'economia, da las scienzas d'infurmaziun, dal turissem, da la construcziun e da la concepziun, da las medias, da la teologia e da la pedagogia porschan questas trais scolas autas da Cuira studis interessants ed innovativs. Uschia è il campus da Cuira – cun tut ils ulteriurs avantatgs da la citad alpina da Cuira – in'alternativa attractiva per studentas e per students da l'entira Svizra e da bleras autras naziuns.
Vasta purschida da furmaziun
La purschida da las scolas professiunalas superiuras dal Grischun sa cumpona da scolaziuns dals secturs da la tecnica, da l'hotellaria, dal turissem, da l'economia, da la sanadad, dals fatgs socials e da l'economia forestala. Ils diploms che vegnan purschids qua signifitgeschan ina perspectiva impurtanta per far ina carriera professiunala cun success ed èn renconuschids e dumandads sin il martgà da lavur.
En il sectur da las scolas medias datti – ultra da la scola chantunala grischuna a Cuira – anc otg autras scolas medias en il Grischun. Er per la furmaziun fundamentala professiunala porscha il chantun Grischun pussaivladads da scolaziun attractivas per glieud da professiun futura.
Spazi da perscrutaziun preferì
Tras lur cuntrada, tras lur clima, tras lur flora e tras lur spazi cultural zunt multifar èn il Grischun e ses territoris vischins in dals spazis da perscrutaziun preferids per ils differents roms da la scienza. En l'Academia raetica èn colliads differents instituts scientifics fitg qualifitgads e differentas clinicas fitg qualifitgadas dal chantun Grischun. Sia finamira è quella da sustegnair la giuventetgna academica sco er da promover la perscrutaziun e la collavuraziun interdisciplinara.