Cun 192'600 abitantas ed abitants è il Grischun il chantun il pli pauc populà da la Svizra. La spessezza da la populaziun importa 27 persunas per kilometer quadrat.

La fin da l'onn 2010 dumbrava il chantun Grischun 192'621 abitantas ed abitants. Cun 27 persunas per kilometer quadrat è il Grischun il chantun il pli pauc populà. En la chapitala da Cuira – in dals abitadis ils pli vegls da la Svizra – vivan var 36'000 persunas.

La "Svizra en format pitschen" – ina designaziun che vegn duvrada savens – constat per il Grischun en spezial areguard la cumposiziun da la populaziun. En il chantun discurra 68 pertschient da la populaziun tudestg, 15 pertschient rumantsch, 10 pertschient talian e 7 pertschient autras linguas.

Questa varietad sa mussa er tar las confessiuns. Var 40 pertschient da la populaziun è evangelica refurmada, var 47 pertschient roman-catolica. Circa 5 pertschient appartegna ad autras direcziuns religiusas. Var 8 pertschient è senza confessiun u na fa naginas indicaziuns davart sia religiun. Circa in quart da la populaziun grischuna ha 19 onns u damain. La quota da persunas d'ina vegliadetgna da 20 fin 64 onns importa 61 pertschient. Pli veglia che 65 onns è circa 16 pertschient da la populaziun.