La varietad culturala, las bellezzas da la cuntrada ed ina infrastructura effizienta – cun hotels ospitaivels, cun telefericas, cun bogns, cun stabiliments da wellness e da sport – èn elements decisivs, per ch'il Grischun saja tant l'enviern sco er la stad ina destinaziun da vacanzas d'emprima qualitad.

Cun San Murezzan e cun Tavau, ils lieus da cura da renum mundial, e cun blers auters lieus gronds u "pitschens ed exquisits" che han in agen scharm, è il Grischun oz in purschider impurtant sin il martgà internaziunal dal temp liber. Il giast d'enviern vul surtut far sport en il Grischun, il giast da stad appreziescha las vastas activitads da stad: viandar, ir cun velo da muntogna, dar golf u simplamain avair plaschair da la natira. Mintga singula regiun ha in caracter tut agen.

Il turissem è ina pitga principala da l'economia publica dal Grischun, pertge ch'el occupa directamain u indirectamain var 30 pertschient da las persunas cun activitad da gudogn en il Grischun. Mintga onn pernotteschan en il Grischun var 12 milliuns giasts en ils totalmain circa 170'000 letgs dals hotels e dals manaschis da cura sco er da la parahotellaria. Ina impurtanza turistica speziala en il Grischun han er occurrenzas grondas sco congress ed arranschaments da sport internaziunals.

Avair quità da l'ambient

Gia il cumenzament dal 20avel tschientaner ha il Grischun gì ina rolla decisiva en il turissem svizzer. Oz è il Grischun in chantun da turissem modern che ha tuttina mantegnì sia diversitad e sia natiralezza variada. L'avertura turistica ha in aut standard.

Per promover er vinavant il turissem, vegnì empruvà en emprima lingia da meglierar la qualitad. Ils cunfins dal svilup e da l'extensiun dal turissem sa chattan là, nua che la protecziun da l'ambient sto vegnir valitada sco pli impurtanta. La diversitad da la natira e da la cuntrada, lur bellezza e lur attractivitad sco er ils spazis da viver intacts èn ina basa impurtanta per ils umans, per ils animals e per las plantas ed uschia er per il turissem.