Il departament da construcziun, traffic e selvicultura occupa var 670 collavuratur/as, da quel/las var 50 sco emploià/das a temp parzial. Per ademplir sias incumbensas multifaras vegn il departament sustegnì dal secretariat sco post da stab sco er da differents uffizis. Quests uffizis sa chattan en la citad da Cuira. Singuls dad els disponan ultra da quai d’unitads decentralas d‘organisaziun ch’èn distribuidas sin l’entira surfatscha dal chantun il pli grond da la Svizra. La decentralisaziun pertutga l’uffizi da construcziun bassa cun ses 7 uffizis districtuals da construcziun bassa, l’uffizi forestal cun ses actualmain 29 uffizis forestals cirquitals (sutdivis en tschintg regiuns forestalas), l’uffizi da chatscha e pestga cun 12 districts da chatscha ed 8 districts da pestga.

Ils fatgs da submissiun è il post d’infurmaziun per las acquisiziuns publicas. El s’occupa da l‘assistenza, la cussegliaziun e la coordinaziun da tut ils departaments, uffizis ed instituts sco er da las vischnancas e d’ulteriurs interessads sin il sectur dals fatgs da submissiun. Plinavant organisescha el occurrenzas d’infurmaziun davart las acquisiziuns publicas sco er la scolaziun e la furmaziun supplementara da las persunas responsablas per la submissiun en il chantun.

Tenor incarica èsi chaussa dal departament e da ses uffizis da preparar las fatschentas per mauns da la regenza u - uschenavant ch’el è autorisà da far quai tenor lescha, ordinaziun u conclus da la regenza - d’ademplir independentamain ils suandants champs d‘incumbensa:

A   Fatschentas generalas

 
• servetsch giuridic dal departament
• fatgs da submissiun
• fatgs da perimeter e d‘expropriaziun
• infurmaziun da la publicitad

B   Construcziun

• construcziun e mantegniment da vias (direcziun superiura da construcziuns, projectaziun, mantegniment da vias, acquist da terren ed administraziun, vias e sendas da viandar)
• construcziuns idraulicas
• construcziuns autas (edifizis da construcziun auta, administraziun d‘immobiglias)

C   Traffic

• traffic public (viasfier, manaschis d’autos da posta e da bus, pendicularas (urari),
• navigaziun (urari)) traffic aviatic

D   Aua ed energia

• utilisaziun da la forza idraulica
• utilisaziun e provediment d‘energia

E   Selvicultura

• protecziun cunter prievels da la natira
• gestiun dal guaud
• gestiun forestala
• mantegniment dal guaud

F   Chatscha e pestga

• surveglianza da chatscha
• tgira da la selvaschina
• surveglianza da pestga
• promoziun e cultivaziun da la pestga

Questas incumbensas vegnan observadas per regla dal departament en collavuraziun cun ils uffizis u ademplidas da quels independentamain.

Per cas che Vus tschertgais contact cun nus: en nossa website chattais Vus las adressas dal departament (schef dal departament e secretariat) sco er ina carta cun il lieu da noss uffizi a Cuira.

Observai per plaschair ch’ils suandants uffizis e posts spezialisads dal departament possedan atgnas websites:

• uffizi d‘energia e da traffic
• uffizi da construcziun auta
• uffizi da construcziun bassa
• servetsch per vias e sendas da viandar
• uffizi forestal
• uffizi da chatscha e pestga


En questas websites chattais Vus tant ina vasta purschida d’infurmaziun sco er in grond dumber da persunas da contact.