Ils 31 da matg 1907 ha il cussegl grond tractà la dumonda dal cussegl pitschen (ozendi regenza) d'engaschar in architect chantunal per manar il servetsch chantunal da construcziun auta. Sch'ins legia la descripziun da la plazza da quella giada, na chattan ins atgnamain betg grondas differenzas tar las exigenzas actualas. Uschia hai num p.ex.: "L'architect chantunal fa la surveglianza da las construcziuns autas che vegnan realisadas dal chantun u da las vischnancas cun contribuziuns dal chantun. El controllescha che questas vegnian exequidas en moda professiunala, solida, tenor las prescripziuns ed entaifer la summa dals custs approvada …". Ultra da quai era el responsabel per il mantegniment spargnus, a temp ed adequat dals edifizis statals. El era er responsabel per il mobigliar, per ils pedels, per ils stgaudaders e per ils ortulans.

Cun il conclus dal cussegl pitschen dals 15 da november 1912 è vegnì relaschà l'emprim reglament da servetsch per la plazza d'in architect chantunal ch'è vegnida stgaffida da nov. En l'art. 1 hai gì num: "L'architect chantunal suttastat al departament da construcziun e da selvicultura. El survegn sias incumbensas dals departaments da la regenza ch'èn mintgamai responsabels per las fatschentas correspundentas. Ses biro furma ina part da l'uffizi chantunal da construcziun e vegn numnà 'uffizi da l'architect chantunal'".

Sur ils onns è il champ d'incumbensas vegnì adattà permanentamain a las exigenzas ed engrondì correspundentamain. Oz è l'uffizi da construcziun auta responsabel per l'entir manaschament d'immobiglias dal chantun. L'istorgia da l'uffizi da construcziun auta reflectescha l'activitad dal chantun ed uschia er la cultura architectonica publica dals ultims 100 onns.