Sut la maxima "Far activamain frunt a la midada dal clima" cuntegna il program da la regenza 2009-2012 puncts centrals da svilup sco l'effizienza energetica e sco la protecziun da l'ambient. Quests puncts centrals ha l'uffizi da construcziun auta integrà en sia strategia per ils posts da servetsch.
Igl è la finamira da sbassar cleramain il consum d'energia dals edifizis e da substituir uschè svelt sco pussaivel ils purtaders d'energia fossils tras purtaders d'energias regenerablas sco er tras la construcziun d'indrizs d'energias alternativas. Gronda attenziun duai vegnir dada a l'applicaziun da materialias da construcziun ch'èn ecologicamain irreproschablas. En cas da midadas da construcziun e da sanaziuns duai vegnir prendì en mira il standard da MINERGIE-ECO. En cas da novas construcziuns duai vegnir prendì en mira en il futur il standard da chasas passivas.
Per duvrar materials da construcziun ecologics èn avant maun directivas internas tar l'uffizi da construcziun auta. Ils materials da construcziun che vegnan duvrads sin il plazzal na dastgan betg donnegiar la sanadad, na dastgan betg chaschunar emissiuns da substanzas nuschaivlas, ston cuntegnair ina part uschè pitschna sco pussaivel d'energia grischa e ston pervia da quai derivar da resursas regenerablas. Questa optica a lunga vista sa paja finalmain er economicamain.
Persistenza tar construcziuns publicas:
http://www.eco-bau.ch