Sin las alps e sin las pastgiras grischunas pon ins vesair questa stad bandierettas cun colurs luminusas avertentas. Ellas èn ina da las bleras mesiras da grischunBIKE.
 
Saivs da pastgira sin sendas da viandar e sin rutas da velos da muntogna pon chaschunar accidents grevs, sch'ellas n'èn betg marcadas en moda adequata u sche la marcaziun manca. En il rom dal project grischunBIKE è vegnida stgaffida ina bandieretta avertenta per la stagiun da velos da muntogna da quest onn. Cun questa bandieretta pon il persunal d'alp, las puras ed ils purs marcar lur saivs da pastgira cleramain, er sche la vesida n'è betg buna. Ultra da las colurs luminusas per ina vesaivladad optimala sin distanza vegnan las ciclistas ed ils ciclists supplitgads sin las bandierettas en quatter linguas da puspè serrar las saivs. Tar la dieta dals chaus d'alp sin il Plantahof ha la bandieretta avertenta chattà in eco fitg positiv. Las bandierettas resistentas a l'aura vegnan consegnadas gratuitamain a las uniuns da traffic, als chaus d'alp sco er a las puras ed als purs. Ellas pon vegnir empustadas sut www.graubuendenbike.ch. 
 
GrischunBIKE è in project dal chantun per meglierar la valurisaziun en il turissem da stad. Cun differentas mesiras duain vegnir meglieradas las cundiziuns generalas da purschidas da las destinaziuns en il sectur dals velos da muntogna. Sut la direcziun dal post spezialisà per il traffic betg motorisà da l'uffizi da construcziun bassa dal Grischun è quest project vegnì lantschà la stad 2010. Uschia vegnan tranter auter eruids questa stad cun agid d'ina vasta retschertga ils basegns da noss giasts ch'èn en gir cun velos da muntogna. Ils resultats da questa retschertga vegnan alura a gidar las destinaziuns da sviluppar purschidas che correspundan als basegns da lur clientella. Cun in scalin en il look da la marca "graubünden" che vegn consegnà gratuitamain vegni renvià al resguard vicendaivel da ciclistas e da ciclistas e da viandantas e da viandants. Ulteriuras infurmaziuns davart quest project sa chattan sut www.graubuendenbike.ch.