Il ressort Applicaziuns sviluppa e tgira la software per l'agen diever da l'administraziun chantunala sco er ina soluziun per vischnancas per incassar las taglias. Ultra da quai vegn per part tgirada la software cumprada che vegn utilisada dals posts da servetsch u da vischnancas.

Il ressort Cussegliaziun sustegna ils posts da servetsch tar la budgetaziun e tar l'acquisiziun da meds d'informatica. Ultra da quai survegnan ils posts da servetsch il sustegn da quest ressort tar l'evaluaziun, tar l'acquisiziun (submissiun) e tar la realisaziun da projects.

Il ressort Sistems fa ir differentas plattafurmas che vegnan utilisadas per gronda part da plirs posts da servetsch. Latiers tutgan p.ex. il server da mail, il "terminal server system", ils servers per differents sistems da bancas da datas, il server per la taxaziun da las taglias da persunas natiralas sur EED sco er il server da la contabilitad da l'administraziun da finanzas. Ina incumbensa essenziala da quest ressort è la planisaziun e la coordinaziun da las mesiras da protecziun cunter virus.

Il ressort Tecnica IC (tecnica d'infurmaziun e da communicaziun) è responsabel per il support da PC/LAN d'ina part dals posts da servetsch.

Il ressort Center da calculaziun è il post central per il funcziunament da la tecnica d'infurmaziun cun sistems d'informatica moderns e cun ina rait da datas effizienta. Prestads vegnan ils suandants servetschs: tgirar las localitads dal center da calculaziun e dals indrizs d'infrastructura, far ir e survegliar ils sistems, administrar e segirar datas, stampar e pachetar cun maschinas.

Il ressort Telecommunicaziun fa ir las raits da datas e da communicaziun da l'administraziun chantunala sin il territori da la citad e dal chantun. I vegnan mess a disposiziun servetschs da rait e da communicaziun, colliaziuns cun raits estras ed ils servetschs da segirezza respectivs.

Il ressort Administraziun procura – ultra da bleras autras incumbensas – per la contabilitad dal UI inclusiv il quint dals custs. El ha er l'incumbensa da facturar las prestaziuns dal UI.