| Pertschient da chapitalisaziun |
Il pertschient da chapitalisaziun è la procentuala, cun la quala la valur da rendita vegn calculada sin basa da la rendita da locaziun netta. El sa cumpona da la tariffa dal tschains dal chapital e dals supplements procentuals dals custs da gestiun. |
| Rendita da locaziun netta | Sco rendita da locaziun netta vala per regla la media da la rendita da locaziun brutta dals ultims 3 onns main ils custs accessorics. La rendita da locaziun netta sa cumpona dals retgavs da l'utilisaziun tras persunas estras u da l'atgna utilisaziun d'edifizis, da surfatschas surbajegiadas e dal terren ch'è necessari per il manaschi. Sche la rendita da locaziun netta na correspunda betg a la valur sin il martgà, vegni sa basà sin la productivitad potenziala. |
| Valur actuala | La valur actuala correspunda a la valur da nov, main la svalitaziun da vegliadetgna tecnica ch'è vegnida chaschunada da la vegliadetgna, da l'isada, da l'influenza da l'aura, dals donns da construcziun, da mancanzas da construcziun u per auters motivs. |
| Valur commerziala |
La valur commerziala sa drizza tenor ils pretschs da vendita ch'èn vegnids obtegnids tar medems u tar sumegliants bains immobigliars sut circumstanzas normalas. |
| Valur da nov |
La valur da nov correspunda als custs ch'èn necessaris per construir in edifizi da la medema spezia, da la medema grondezza e dal medem standard al medem lieu. Per stimar edifizis novs e midadas architectonicas ston ins sa basar sin il rendaquint da construcziun. La valur da nov d'edifizis vegls sco er d'edifizis che han ina impurtanza istorica u ina impurtanza areguard la tgira da monuments correspunda als custs che vegnan stimads per la reconstrucziun en la moda da construcziun existenta u cumparegliabla. |
| Valur da rendita | La valur da rendita correspunda a la rendita da locaziun netta da las valurs da facultad utilisablas, la quala vegn chapitalisada mintga onn.
Valur da rendita = rendita da locaziun netta x 100 : pertschient da chapitalisaziun |
| Valur fiscala |
Per eruir la valur fiscala èn decisivas la valur da rendita e la valur commerziala. La valitaziun da las duas valurs sa drizza tenor la lescha da taglia.
La pratica vertenta sa preschenta sco suonda:
Chasas d'abitar, chasas da fatschenta ed abitaziuns d'atgna proprietad:
2 x valur da rendita + 1 x valur commerziala : 3 = valur fiscala Lavuratoris e hallas da deposit
valur da rendita + valur commerziala : 2 = valur fiscala |
| Valur reala | La valur reala sa cumpona da la valur actuala (valur dal stadi) da tut ils stabiliments sin il bain immobigliar, da las lavurs preparatoricas ch'èn necessarias per construir quels, da las lavurs da conturn e dals custs da construcziun accessorics plus la valur dal terren. |