Incumbensas da la controlla da finanzas dal chantun Grischun
La lescha davart la surveglianza da las finanzas è entrada en vigur il 1. da mars 2012
Suenter l'entrada en vigur da la lescha davart la surveglianza da las finanzas (LSFi; DG 710.300) ha la controlla da finanzas per l'emprima giada in'atgna lescha che regla ses dretgs e sias obligaziuns. Ils 19 d'october 2011 ha il cussegl grond concludì da relaschar la lescha davart la surveglianza da las finanzas (LSFi) en il rom da la realisaziun dal MAC2. Formalmain è la LSFi in nov relasch. Materialmain èn las disposiziuns davart la surveglianza da las finanzas da la lescha davart las finanzas e davart la surveglianza da las finanzas dal chantun Grischun (LFSF) vegnidas surpigliadas cun intginas pitschnas adattaziuns e transferidas en in relasch separà. Quai exprima cleramain che la LSFi vala mo per il chantun, entant che la lescha davart las finanzas (LFC) – ch'è vegnida relaschada en il rom da la realisaziun dal MAC2 – vala per il chantun e per las vischnancas.
Suenter ch'igl è vegnì fatg ina discussiun da princip davart l'organisaziun da la surveglianza da las finanzas e davart la posiziun da la controlla da finanzas cun relaschar la LFSF ch'è entrada en vigur il 1. da schaner resp. la fin d'avust 2008, n'èsi betg stà inditgà – ni per motivs materials ni temporals – da puspè far ina tala discusssiun l'onn 2011. Sin fundament da las emprimas experientschas e sin fundament da las indicaziuns da la cumissiun da gestiun dal cussegl grond (CdG) èn vegnidas repassadas mo paucas disposiziuns per far precisaziuns u per motivs linguistics. En spezial èn vegnidas eliminadas malsegirezzas en connex cun las cumpetenzas (organisatoricas) da la controlla da finanzas e dal gremi paritetic. Per l'ina cun precisar l'artitgel correspundent 3 LSFi e per l'autra cun cumplettar la cumpetenza da la controlla da finanzas tras las disposiziuns finalas en la lescha dal persunal.
La lescha davart la surveglianza da las finanzas regla en 21 artitgels las activitads da la controlla da finanzas. Ils artitgels ils pli impurtants èn:
Art. 1
1 La controlla da finanzas è l'organ suprem da la surveglianza da las finanzas. Ella sustegna:
a) il cussegl grond e sia cumissiun da gestiun exequind la surveglianza da las finanzas sur da l'administraziun, sur da la dretgira chantunala e sur da la dretgira administrativa sco er sur dals instituts autonoms da dretg public;
b) la regenza ed ils departaments exequind la surveglianza da las finanzas sur da l'administraziun;
c) la dretgira chantunala e la dretgira administrativa en connex cun ils aspects finanzials da la surveglianza da la giustia.
2 La controlla da finanzas è professiunalmain independenta ed è autonoma. En sia activitad da controlla è ella obligada mo a la constituziun ed a la lescha. Ella fixescha annualmain ses program da controlla ed al suttametta a la cumissiun da gestiun dal cussegl grond, a la regenza ed – en extracts – a la dretgira chantunala ed a la dretgira administrativa per laschar prender enconuschientscha.
3 La regenza e la cumissiun da gestiun concludan ina cunvegna da finamiras e da prestaziun cun la controlla da finanzas.
4 La controlla da finanzas è suttamessa administrativamain al departament da finanzas e vischnancas.
Art. 2
1 A la surveglianza da las finanzas tras la controlla da finanzas èn suttamess – cun resalva d'ina regulaziun divergenta en leschas spezialas:
a) la contabilitad dal cussegl grond;
b) l'administraziun chantunala;
c) l'administraziun da la dretgira chantunala e da la dretgira administrativa;
d) ils instituts da dretg public dal chantun;
e) las organisaziuns e las persunas ordaifer l'administraziun chantunala, a las qualas il chantun surdat incumbensas publicas;
f) organisaziuns e persunas che survegnan contribuziuns chantunalas considerablas.
2 La controlla da finanzas surveglia las finanzas er là, nua ch'igl è vegnì endrizzà in agen post da revisiun u da controlla tenor la lescha u tenor ils statuts. Ella coordinescha sia activitad cun auters organs che han incumbensas da controlla.
3 L'activitad da surveglianza tenor l'alinea 1 literas d ed e sa restrenscha da princip al rapport da gestiun, al quint annual ed al rapport da revisiun. Ulteriuras controllas pon vegnir fatgas da la controlla da finanzas mo per incumbensa da la cumissiun da gestiun u da la regenza.
4 L'activitad da surveglianza tenor l'alinea 1 litera f vegn fatga en coordinaziun cun il departament ch'è cumpetent per la surveglianza.