Il concordat dals chantuns da la Svizra orientala davart l'execuziun da chastis e da mesiras
La constituziun federala svizra prevesa en l'art. 48 ch'ils chantuns possian far contracts tranter els (uschenumnads concordats) per dumondas che tutgan a lur cumpetenza.
Perquai che l'execuziun da chastis è cumplainamain chaussa dals chantuns, èn ils chantuns Appenzell dadens, Appenzell dador, Glaruna, Grischun, Schaffusa, Son Gagl, Turgovia e Turitg s'unids en il concordat dals chantuns da la Svizra orientala davart l'execuziun da chastis e da mesiras per reglar e per organisar cuminaivlamain l'execuziun da chastis.
L'organ suprem dal concordat è la cumissiun d'execuziun da chastis da la Svizra orientala che consista da mintgamai ina represchentanta u in re¬preschentant da la re¬genza dals chantuns participads.
La cumissiun d'execuziun da chastis da la Svizra orientala ha il dretg da relaschar directivas davart singulas dumondas da l'execuziun. Uschia p.ex. davart la concessiun da congedis en l'execuziun u davart la concessiun da furmas spezialas da l'execuziun. La cumissiun d'execuziun da chastis fixescha ultra da quai las taxas da di per ils stabiliments d'execuziun.
Ils ulteriurs dus concordats da l'execuziun da chastis da la Svizra
Concordat da la Svizra dal nordvest e da la Svizra centrala:
Argovia, Basilea-Champagna, Basilea-Citad, Berna, Lucerna, Soloturn, Sursilvania, Sutsilvania, Sviz, Uri, Zug
Concordat da la Svizra romanda e da la Svizra taliana:
Friburg, Genevra, Giura, Neuchâtel, Vad, Vallais, Tessin