L'execuziun da chastis sto partir dal fatg, ch'ella ha da far cun umans ch'èn cumplettamain differents. Lur tratg communabel è mo il conflict cun la societad. L'execuziun duai promover a schliar quest problem. Tar tschertinas e tar tschertins reussescha quai, tar autras e tar auters betg. Nus na pudain betg savair ordavant tgi che tutga a tge gruppa. I n'ans resta perquai nagut auter che da dar ina schanza a tuts. Nus stuain dentant viver cun il fatg che l'emprova malreussescha tar ina part. Il maletg da l'uman en l'execuziun da chastis na dastga ni esser naiv ni resignà. El sto mantegnair ina tscherta distanza per savair giuditgar en moda objectiva. El duess restar avert vers tut las varts.

La normalisaziun da la vita en il stabiliment dastga vegnir designada sco in concept central da la politica da l'execuziun da chastis ch'è renconuschì generalmain. Sut quai chapeschan ins l'assimilaziun da las relaziuns en il mintgadi entaifer il stabiliment a quellas ordaifer il stabiliment, en spezial cun crear pretensiuns confurmas a la realitad per las praschunieras e per ils praschuniers. Il mintgadi en il stabiliment duai daventar in champ d'emprender il cumportament social e duai crear uschia premissas favuraivlas per la relaschada.


Finamiras generalas

L'art. 75 al. 1 dal cudesch penal svizzer pretenda che l'execuziun da chastis duai avair in effect educativ sin la praschuniera u sin il praschunier ed als preparar per il return en la vita civila. Ella duai ultra da quai effectuar che l'entiert ch'è vegnì fatg a la persuna donnegiada vegnia puspè fatg bun. Uschia è il stabiliment giudizial Realta ina instituziun che ademplescha bleras aspectativas: La praschuniera u il praschunier spetga agid, lur parents spetgan chapientscha, las persunas donnegiadas dal delict spetgan ina indemnisaziun e la societad spetga ina reducziun da la criminalitad.
L'incumbensa principala dal stabiliment giudizial Realta è quella da gidar la praschuniera u il praschunier a chattar en l'avegnir l'atgna responsabladad per sia vita e ch'ella u el respectia e resguardia ils dretgs e la dignitad da ses conumans. Il reglament da chasa serva sco mussavia per reglar la vita en la cuminanza da la praschun en ina moda umana. Las finamiras fixadas ensemen cun la praschuniera u cun il praschunier en ils plans d'execuziun pon vegnir cuntanschidas mo, sche er ella u el è pront da collavurar activamain.L'art. 75 al. 1 dal cudesch penal svizzer pretenda che l'execuziun da chastis duai avair in effect educativ sin la praschuniera u sin il praschunier ed als preparar per il return en la vita civila. Ella duai ultra da quai effectuar che l'entiert ch'è vegnì fatg a la persuna donnegiada vegnia puspè fatg bun. Uschia è il stabiliment giudizial Realta ina instituziun che ademplescha bleras aspectativas: La praschuniera u il praschunier spetga agid, lur parents spetgan chapientscha, las persunas donnegiadas dal delict spetgan ina indemnisaziun e la societad spetga ina reducziun da la criminalitad. L'incumbensa principala dal stabiliment giudizial Realta è quella da gidar la praschuniera u il praschunier a chattar en l'avegnir l'atgna responsabladad per sia vita e ch'ella u el respectia e resguardia ils dretgs e la dignitad da ses conumans. Il reglament da chasa serva sco mussavia per reglar la vita en la cuminanza da la praschun en ina moda umana. Las finamiras fixadas ensemen cun la praschuniera u cun il praschunier en ils plans d'execuziun pon vegnir cuntanschidas mo, sche er ella u el è pront da collavurar activamain.