Incarica d'execuziun

Art. 75 CP
L'execuziun da chastis sto promover il cumportament social da la praschuniera u dal praschunier, en spezial l'abilitad da viver senza chasti. L'execuziun da chastis sto correspunder a las relaziuns generalas da vita uschè bain sco pussaivel, garantir l'assistenza da la praschuniera u dal praschunier, cumbatter consequenzas nuschaivlas da la privaziun da la libertad e tegnair quint adequatamain da la protecziun dal public, dal persunal d'execuziun sco er da las cumpraschunieras e dals cumpraschuniers.

L'urden dal stabiliment prevesa da planisar l'execuziun ensemen cun la praschuniera u cun il praschunier. Quella planisaziun cuntegna particularmain las indicaziuns davart l'assistenza purschida, davart las pussaivladads da lavur sco er da scolaziun e da furmaziun supplementara, davart l'indemnisaziun, davart las relaziuns cun il mund ordaifer il stabiliment da retenziun e davart la preparaziun da la relaschada.
La praschuniera u il praschunier sto cooperar activamain tar las stentas da socialisaziun e tar las preparaziuns da la relaschada.


Lieu d'execuziun

Art. 76
Chastis che priveschan da la libertad vegnan exequids en in stabiliment da retenziun serrà u avert.
La praschuniera u il praschunier vegn collocà en in stabiliment da retenziun serrà u en ina partiziun serrada d'in stabiliment da retenziun avert, sch'igl exista il privel ch'ella u ch'el pudess mitschar u sch'ins sto temair ch'ella u ch'el commettia ulteriurs delicts.


Concepziun da l'execuziun da chastis e da mesiras

Per concepir l'execuziun da chastis e da mesiras en il stabiliment per l'execuziun giudiziala Sennhof valan: 

• il cudesch penal svizzer (en spezial ils art. 74 – 92 CP); 
• l'ordinaziun davart l'execuziun giudiziala en il chantun Grischun; 
• las directivas dal concordat da la cumissiun d'execuziun da chastis da la Svizra orientala; 
• l'urden da chasa dal stabiliment per l'execuziun giudiziala Sennhof (UC); 
• sco er directivas e reglaments che cumpletteschan l'urden da chasa.