1603
Hans Jacob Wegerich dad Ernau (1562 – 1606), cusseglier da la citad e maister da munaida da l'uvestg, construescha il Sennhof. Il Sennhof serva sco chasa d'abitar sco er per intents agriculs, temporarmain sco fabrica da savun.

1817
Il chantun cumpra l'immobiglia Sennhof per ca. 40'000.– francs e la metta en funcziun sco "institut da chasaforz". L'emprim derschader chantunal d'inquisiziun, barun Heinrich von Mont, cumenza cun ses uffizi che ha sia sedia en il Sennhof.

1830
L'uschenumnada chasa melna (cun laina radunda) vegn construida. Ella vegn crititgada da tuttas varts gia l'onn 1842, resta dentant en funcziun fin l'onn 1949.

1866
Construcziun da la chasa d'inquisiziun (per praschunieras e per praschuniers d'inquisiziun) per lung da la Sennhofstrasse.

1934
Renovaziun e cumplettaziun dal Sennhof, engrondiment da l'edifizi.

1949
La chasa melna cun laina radunda vegn serrada, perquai ch'ella è en in nausch stadi e na satisfa insumma betg pli a las pretensiuns per l'execuziun.

1963
La chasa melna cun laina radunda vegn disfatga. Il cussegl grond conceda 1.06 milliuns francs per la renovaziun e per la cumplettaziun dal Sennhof.

1964
Tranter la tur veglia da l'anteriur mir da la citad ed il tract d'inquisiziun vegn construì in nov edifizi da cellas en furma dad artg; la tur vegn renovada a l'intern (chaplutta, biblioteca). Il tract cun ils biros da la procura publica vegn engrondì ed auzà. Uschia han ins dapli lieu per biros e per in'abitaziun per la direcziun da la praschun. La regenza suttametta il manaschi da la praschun a la procura publica.

1969/1971
Renovaziun da l'edifizi da magasin ed installaziun d'ufficinas per las praschunieras e per ils praschuniers sco er da localitads per il temp liber.

1972/1973
Installaziun da localitads polivalentas per ils manaschis artisanals. Integraziun dal biro per l'administraziun dal Sennhof, nov local da segiurn per las praschunieras e per ils praschuniers, duas ulteriuras cellas per dunnas.

1984 (settember)
L'edifizi da manaschi dal mastergn vegn disfatg. Cumenzament da la construcziun nova (ufficinas da manaschi ed 11 cellas per la mesa-praschunia, custs 4 milliuns francs).

1986 (november)
Festa d'inauguraziun.

1991
Lavurs da renovaziun e da cumplettaziun en l'edifizi vegl per lung da la Sennhofstrasse. Construcziun nova d'ina partiziun da dunnas cun localitads da lavur e da segiurn correspundentas. Construcziun nova da la partiziun dals umens per l'execuziun da chastis, da la partiziun da segirezza, da la centrala da segirezza, dal secretariat, dals locals da segiurn per ils praschuniers, da la cuschina nova dal stabiliment, da la curt per ir a spass, dal local da seminari, da l'ascensur.

1992 (december)
Fin da las lavurs da construcziun (custs 8 milliuns francs).

1993
Avertura da la partiziun da mesa-praschunia a Silvaplauna.
4 plazzas.

1995
La praschun dal Sennhof vegn separada organisatoricamain da la procura publica dal Grischun e transfurmada en in post da servetsch autonom.

1996
Avertura da la mesa-praschunia a la Wagnergasse a Cuira che ha plazza per 19 praschunieras e praschuniers.

1998
Renovaziun e midada da chasa da la partiziun da mesa-praschunia a Silvaplauna.

2003 (november)
Avertura da la nova partiziun da l'arrest preparatoric e da l'arrest d'expulsiun, 20 plazzas.

2007
Il stabiliment per l'execuziun giudiziala Sennhof vegn integrà en l'uffizi per l'execuziun giudiziala ch'è vegnì stgaffì da nov.