Il sectur spezial da l'execuziun da chastis exequescha ils chastis che priveschan da la libertad ch'èn vegnids pronunziads e la prestaziun da las lavurs ch'è vegnida ordinada da dretgiras dal Grischun, da la procura per giuvenils e da las autoritads da persecuziun penala. Sco assistenza giudiziala vegnan er exequids chastis d'auters chantuns e da l'exteriur.

La cumpetenza cumpiglia en spezial: 

• la regulaziun e l'execuziun da chastis che priveschan da la libertad e ch'èn vegnids ordinads d'ina dretgira sco er da lavurs d'utilitad publica (persunas creschidas) 
• la regulaziun e l'execuziun da chastis che priveschan da la libertad, da la prestaziun persunala da lavurs sco er da curs per prevegnir a la dependenza sco er a la violenza (giuvenils) 
• la fixaziun da la furma d'execuziun en cas da chastis che priveschan da la libertad, numnadamain l'execuziun dal chasti en mesa praschunia, en in stabiliment da retenziun avert u serrà 
• la determinaziun dal stabiliment adattà u da l'instituziun adattada (lieu d'execuziun) 
• la fixaziun dal termin da cumenzament (termin d'execuziun) ed uschia la decisiun, sch'il chasti duai vegnir suspendì u sche la persuna è en cas d'expiar ses chasti 
• il cumond cur che l'execuziun dal chasti stoppia vegnir cumenzada 
• la concepziun d'incaricas d'execuziun sco er la planisaziun da l'execuziun en collavuraziun cun l'instituziun 
• la cumpetenza da delegar regulaziuns d'execuziun (cundiziuns generalas concretas e stgalims d'execuziun sco l'alloschi e la lavur en l'externat) 
• la decisiun davart ina interrupziun dal chasti 
• la decisiun davart ina sistida da la lavur d'utilitad publica 
• la decisiun davart la relaschada cundiziunada or da l'execuziun dal chasti
• • la concepziun e la surdada da dumondas a las dretgiras ed a las autoritads da persecuziun penala per exempel per revocar ina relaschada cundiziunada sco er per transfurmar in chasti da lavur en in chasti pecuniar u en in chasti che privescha da la libertad