08-10-2007
Entrada en vigur LEst/LAsil
Ils 26 da settember 2006 ha la populaziun svizra acceptà la nova lescha federala davart las persunas estras (LEst) e la lescha d'asil (LAsil) revedida. La confederaziun ha planisà gia daditg l'entrada en vigur per il 1. da schaner 2008. Fin oz n'èn ni vegnidas relaschadas las ordinaziuns necessarias ni vegnida concludida definitivamain l'entrada en vigur. Las infurmaziuns necessarias en quest connex vegnan publitgadas qua pli tard.
19-09-2007
Rumenia e Bulgaria
La participaziun dals dus stadis Rumenia e Bulgaria a la UE l'onn 2007 n'ha ad interim nagina influenza sin la pratica d'admissiun da forzas da lavur da quests stadis. Tut ils contracts da la Svizra cun la UE davart la libra circulaziun da persunas pertutgan mo las forzas da lavur dals 25 stadis da la UE d'enfin ussa. Per pudair applitgar la libra circulaziun da persunas er per ils novs stadis, ston vegnir concludids novs contracts. La stad 2007 han cumenzà las tractativas per extender la cunvegna davart la libra circulaziun sin la Rumenia e sin la Bulgaria. Persunas ch'èn burgaisas da la Rumenia e da la Bulgaria na pon per il mument pia betg sa referir a la cunvegna davart la libra circulaziun da persunas, e quai malgrà la participaziun a la UE.
18-09-2007
Schengen/Dublin
Il zercladur 2005 ha il pievel svizzer acceptà las cunvegnas bilateralas da Schengen/Dublin. Malgrà che la Svizra ha fatg sforzs enorms, sa retardescha l'entrada en vigur pervia da resalvas da singuls stadis da la UE (Grezia, Tschechia, Belgia). Questas cunvegnas d'associaziun tar Schengen/Dublin n'èn betg anc vegnidas ratifitgadas da la UE. Davart las consequenzas concretas dals contracts As infurmain nus, uschespert ch'il termin da l'entrada en vigur è fixà.
06-09-2007
Il scumond dal dretg da burgais dubel per burgaisas e per burgais da la UE sco er per Svizras e per Svizzers en Germania vegn abolì
Dapi ils 28 d'avust 2007 na perdan ins betg pli la naziunalitad tudestga, sch'ins acquista la naziunalitad d'in stadi commember da la UE u da la Svizra.
Medemamain pon burgaisas e burgais da la UE sco er Svizras e Svizzers acquistar la naziunalitad tudestga, senza ch'ellas e ch'els stoppian renunziar a lur naziunalitad oriunda.
18-09-2007
Schengen/Dublin
Il zercladur 2005 ha il pievel svizzer acceptà las cunvegnas bilateralas da Schengen/Dublin. Malgrà che la Svizra ha fatg sforzs enorms, sa retardescha l'entrada en vigur pervia da resalvas da singuls stadis da la UE (Grezia, Tschechia, Belgia). Questas cunvegnas d'associaziun tar Schengen/Dublin n'èn betg anc vegnidas ratifitgadas da la UE. Davart las consequenzas concretas dals contracts As infurmain nus, uschespert ch'il termin da l'entrada en vigur è fixà.
06-09-2007
Il scumond dal dretg da burgais dubel per burgaisas e per burgais da la UE sco er per Svizras e per Svizzers en Germania vegn abolì
Dapi ils 28 d'avust 2007 na perdan ins betg pli la naziunalitad tudestga, sch'ins acquista la naziunalitad d'in stadi commember da la UE u da la Svizra.
Medemamain pon burgaisas e burgais da la UE sco er Svizras e Svizzers acquistar la naziunalitad tudestga, senza ch'ellas e ch'els stoppian renunziar a lur naziunalitad oriunda.
07-08-2007
Patentas da chatscha pir a partir dals 15 d'avust!
Las patentas da chatscha pon vegnir cumpradas pir a partir dals 15 d'avust 2007. Fin a quest termin na po l'uffizi da fatgs da polizia e da dretg civil dal Grischun emetter naginas patentas. La communicaziun en la "Südostschweiz" dals 2 d'avust 2007, tenor la quala las patentas da chatscha possian vegnir cumpradas ussa, è faussa! La data correcta da la vendita è publitgada en il fegl uffizial dal chantun Grischun.
06-07-2007
Fimar fa donn …
Participaziun a l'acziun "plazzadalavur.senzafim"
L'uffizi da fatgs da polizia e da dretg civil dal Grischun protegia sias collavuraturas e ses collavuraturs cunter il fimar passiv.
Ulteriuras infurmaziuns davart la "plazzadalavur.senzafim" sco er ils detagls areguard las cundiziuns da participaziun per categoria chattais Vus sut il suandant link www.rauchenschadet.ch (tudestg)
05-07-2007
Ediziun speziala da la lescha dal dretg da burgais
• lescha dal dretg da burgais dal chantun Grischun (LDBchant)
• ordinaziun tar la lescha dal dretg da burgais dal chantun Grischun (ODBchant)
• lescha federala davart l'acquist e la perdita dal dretg da burgais svizzer (lescha davart il dretg da burgais [LDB])
fr. 5.00
Centrala per stampats e material (CSM) dal chantun Grischun
Planaterrastr. 16, 7001 Cuira
tel. 081 257 22 60 / fax 081 257 21 91
mail: bestellungen@dmz.gr.ch
Questa broschura datti mo per tudestg e per talian!
05-07-2007
L'integraziun da persunas estras vegn promovida
L'integraziun da persunas estras duai vegnir promovida pli fitg. La regenza grischuna ha surdà la direcziun e la coordinaziun en il sectur da l'integraziun dal dretg da persunas estras e dal dretg d'asil a l'uffizi da fatgs da polizia e da dretg civil. Per realisar tut las incumbensas che resultan en il sectur da l'integraziun dal dretg da persunas estras e dal dretg d'asil sco er en connex cun il cumbat cunter il rassissem vegn ultra da quai stgaffida per il 1. da schaner 2008 ina plazza per ina incumbensada u per in incumbensà d'integraziun.
En il rom da la nova lescha davart las persunas estras e da la revisiun da la lescha d'asil sco er da las ordinaziuns respectivas vegnan regladas da nov las cumpetenzas tranter la confederaziun ed ils chantuns en il sectur da l'integraziun. L'execuziun e la realisaziun dal program prioritar da la confederaziun vegnan ad esser chaussa dals chantuns. Da questa midada resultan novas pretensiuns per la politica chantunala d'integraziun. Analogamain a la regulaziun federala è il sectur da la politica chantunala d'integraziun en il sectur da las persunas estras domicilià ussa tar l'uffizi da fatgs da polizia e da dretg civil. Quel porta la responsabladad per manar e per realisar la promoziun da l'integraziun. El administrescha er las contribuziuns d'integraziun che vegnan pajadas da la confederaziun en il rom d'in fond d'integraziun che sto vegnir stgaffì da nov. L'incumbensada u l'incumbensà d'integraziun vegn a coordinar las mesiras concernent ina integraziun sociala, professiunala e culturala da fugitivas e da fugitivs, da persunas cun basegn da protecziun che han ina permissiun da dimora e da persunas ch'èn admessas provisoricamain, sco er a realisar las ulteriuras incumbensas d'integraziun dal chantun.
Persuna che dat infurmaziuns:
Heinz Brand, schef da l'uffizi da fatgs da polizia e da dretg civil, tel. 081 257 25 21
31-05-2007
Augment tar las burgaisas e tar ils burgais da la UE-27/AECL
La fin d'avrigl 2007 dumbrava la populaziun residenta permanenta che deriva dals 27 pajais da la UE e dals pajais da la AECL (UE-27/AECL) 917'855 persunas. Quai è 2 pertschient dapli che la fin d'avrigl 2006. Il dumber da las persunas estras che na derivan betg da stadis da la UE è dentant sa reducì en la medema perioda per 1,5 pertschient.
En il chantun Grischun sa chattava quest dumber tar 27'129 persunas (14,4 pertschient). Quai è in augment da 2 pertschient.
2006
30-10-2006
Viagiar en ils Stadis unids da l'America cun in passaport provisoric e cun in passaport biometric ch'è defect
Tenor ina communicaziun a las medias tras il departament federal da giustia e polizia pon ins viagiar er suenter ils 26-10-2006 en ils Stadis unids da l'America cun in passaport biometric ch'è defect ed ad interim er anc cun in passaport provisoric senza datas biometricas, e quai senza visum.
28-06-2006
Contingents da la CE/AECL
A partir d'immediat na stattan betg pli a disposiziun contingents per burgaisas e per burgais da la CE/AECL fin la fin d'avust 2005 per permissiuns da dimora permanenta (permissiuns B). Permissiuns da dimora permanenta na pon perquai betg pli vegnir concedidas a burgaisas ed a burgais da la CE/AECL. L'uffizi da fatgs da polizia e da dretg civil dal Grischun dat perquai mo anc permissiuns da dimora curta per la durada da maximalmain 1 onn.
28-06-2006
Il chantun Grischun survegn in center da registraziun per passaports biometrics
Tenor ina decisiun dal departament federal da giustia e polizia vegnan endrizzads – per la registraziun da las datas biometricas – otg centers per ils novs passaports. Il chantun Grischun ha medemamain survegnì l'agiudicaziun. Burgaisas e burgais han pia en il futur la pussaivladad da laschar registrar las datas per ils passaports biometrics en il chantun Grischun.
La communicaziun a las medias sco er ulteriuras infurmaziuns chattais Vus sut "passaports".
28-06-2006
Retard per il passaport biometric
Il nov passaport biometric svizzer na po probablamain betg vegnir introducì sco previs per la fin da l'onn. In motiv per il retard èn novas normas tecnicas da la UE che la Svizra vul resguardar.
Il motiv per introducir il nov passaport è la pretensiun dals Stadis unids che tut ils passaports emess suenter ils 26 d'october 2005 stoppian esser munids cun las datas biometricas ch'èn necessarias per entrar senza visum en ils Stadis unids. Ils passaports legibels d'ina maschina ch'èn vegnids emess avant questa data restan valaivels per entrar e passar ils Stadis unids senza visum.
L'uffizi da fatgs da polizia e da dretg civil dal Grischun recumonda a tut las Grischunas ed a tut ils Grischuns che han l'intenziun da viagiar proximamain en ils Stadis unids d'ordinar uschè prest sco pussaivel, dentant fin il pli tard la fin da settember 2005, in nov passaport (model 03).