Suenter lur entrada en Svizra vegnan las requirentas ed ils requirents d'asil assegnads ad in dals quatter centers d'accoglientscha da l'uffizi federal da migraziun (Kreuzlingen, Basilea, Vallorbe, Chiasso). En quests centers vegnan registradas las persunalias e prendidas las improntas, vegn fatga l'emprima intervista curta davart ils motivs da l'asil sco er silsuenter la distribuziun als chantuns.

L'uffizi federal da migraziun assegna las requirentas ed ils requirents d'asil als chantuns. La decisiun d'assegnaziun po vegnir contestada cun la motivaziun ch'ella violeschia il princip da l'unitad da la famiglia. Actualmain survegn il chantun Grischun 2.7 % da tut las requirentas e da tut ils requirents d'asil.

Suenter ina dimora da ca. 1 - 3 emnas en in center d'accoglientscha survegnan las requirentas ed ils requirents d'asil in bon da viafier per il viadi en quel chantun, al qual ellas u els èn vegnids assegnads. En il Grischun succeda l'admissiun sco er l'assegnaziun als differents centers transitoris tras la chanzlia da l'organisaziun d'asil che vegn manada da l'uffizi chantunal dal servetsch social.

Entaifer 20 dis dapi l'assegnaziun al chantun sto succeder l'audienza chantunala davart ils motivs d'asil che vegn fatga da l'uffizi da fatgs da polizia e da dretg civil dal Grischun, partiziun "asil e mesiras". A l'interrogaziun èn preschents, ultra da la requirenta u dal requirent d'asil e da l'interrogatura u da l'interrogatur chantunal, ina translatura u in translatur, ina represchentanta u in represchentant d'ina ovra d'agid sco observatura u sco observatur neutral che na prenda betg posiziun per ina partida sco er ina secretaria u in secretari per scriver immediat il protocol. L'interrogaziun vegn fatga cun la finamira d'eruir sche pussaivel tut ils motivs relevants per l'asil, per ch'i possia vegnir prendida ina decisiun d'asil sin fundament dal protocol. L'uffizi federal da migraziun decida silsuenter davart la concessiun u la refusa da l'asil sco er davart la spedida da la Svizra.