En general
L'uffizi federal da migraziun (UFM) emetta sut tschertas circumstanzas documents da viadi svizzers per burgaisas estras e per burgais esters che sa trategnan legalmain en Svizra. I sa tracta dals suandants documents:

Document da viadi per fugitivas e per fugitivs (blau stgir)
Ina persuna estra che ha survegnì asil u ch'è vegnida admessa provisoricamain sco fugitiva u sco fugitiv en Svizra, ha il dretg d'in document da viadi per fugitivas e per fugitivs.

Passaport per ina persuna estra (verd)
Ina persuna senza naziunalitad, renconuschida dal UFM, ha – tenor la cunvegna dals 28 da settember 1954 davart la posiziun giuridica da las persunas senza naziunalitad – il dretg d'in passaport per ina persuna estra.

Document d'identitad (grisch)
Il document d'identitad po vegnir dà a persunas che basegnan protecziun, a persunas admessas provisoricamain sco er a requirentas ed a requirents d'asil, sche questas persunas èn senza documents da legitimaziun. Il document d'identitad autorisescha il return en Svizra mo, sch'el è munì cun ina permissiun da return valaivla dal UFM; el vegn emess per regla mo per in viadi a l'exteriur.

Valaivladad
Document da viadi per fugitivas e per fugitivs: 5 onns
Passaport per ina persuna estra: 5 onns
Document d'identitad: 1 onn

Suenter la scadenza da la valaivladad po la persuna estra dumandar in nov document da viadi.

Proceder 
Tgi che vul dumandar in document da viadi, sto sa preschentar persunalmain tar l'uffizi da fatgs da polizia e da dretg civil dal Grischun, Karlihof 4, 7000 Cuira.

Sche pussaivel sto la dumonda vegnir inoltrada sis emnas avant la scadenza da la valaivladad dal vegl document u avant il viadi previs. Ils documents da viadi scadids ston vegnir consegnads a l'uffizi da fatgs da polizia e da dretg civil.

• Documents da viadi per fugitivas e per fugitivs / passaport per ina persuna estra
  (passaports biometrics)
  Cur che Vus As preschentais al spurtegl, stuais Vus purtar cun Vus ils documents da viadi ch'èn eventualmain scadids sco er in document d'identitad (legitimaziun da persunas estras).
   
• Document d'identitad (cun/senza permissiun da return)
  (nagins passaports biometrics)
  Cur che Vus As preschentais al spurtegl, stuais Vus purtar cun Vus ils documents da viadi ch'èn eventualmain scadids, in document d'identitad (legitimaziun da persunas estras) sco er ina fotografia da passaport (qualitad che correspunda a las pretensiuns per il passaport svizzer).
  Ils suandants formulars da dumonda ston vegnir emplenids:
  • "Gesuch um Ausstellung eines Reisedokuments" (sto vegnir emplenì da la persuna che fa la dumonda)
  • Persunas senza documents da legitimaziun ston agiuntar als documents da dumonda menziunads qua survart er il formular "Schriftenlosigkeit"
  (Formulars a dretg)

L'emissiun d'in document da viadi u d'ina permissiun da return è suttamessa a l'obligaziun da pajar taxas.