Cunter las decisiuns d'asil da l'uffizi federal da migraziun pon las requirentas ed ils requirents d'asil far recurs tar il Tribunal administrativ federal. Sche l'effect suspensiv n'è betg vegnì retratg expressivamain en la decisiun d'asil, han recurs per regla in effect suspensiv concernent l'obligaziun da partenza.

Senza l'inoltraziun d'in recurs u suenter ina decisiun da recurs negativa obtegna la decisiun da l'uffizi federal da migraziun vigur legala. Entaifer il termin da partenza fixà en la decisiun sto la persuna refusada bandunar la Svizra. La surveglianza ed in'eventuala execuziun da la partenza è chaussa dals chantuns. Questa incumbensa cumpiglia la procuraziun da documents da viadi, da bigliets da viafier e d'aviun, d'organisaziuns da viadi e da transport e.u.v. Durant il termin da partenza statti liber a las persunas refusadas d'eleger libramain ils meds da transport ed il traject da viadi. La cundiziun è che la partenza resp. ch'il transit en in pajais vischin possia succeder legalmain ed en cas da basegn cun in visum correspundent. Sch'i na po betg vegnir procurà in visum u in document da viadi, ston las persunas refusadas bandunar la Svizra per aviun en direcziun da lur patria.

Sch'il termin da partenza è scadì e sche la persuna refusada n'è betg s'annunziada tar l'uffizi da fatgs da polizia e da dretg civil dal Grischun, partiziun "asil ed execuziun da mesiras", fa la polizia chantunala en mintga cas ils scleriments correspundents davart sia dimora. Sch'i resulta da quai che la persuna respectiva sa trategna anc adina en Svizra, vegn ordinada la repatriaziun tras la polizia. L'emprim ston dentant vegnir procurads ils documents da viadi necessaris tar las ambassadas correspundentas.