En general

Requirentas e requirents d'asil, persunas che basegnan protecziun senza ina permissiun da dimora e persunas admessas provisoricamain èn suttamessas a l'obligaziun da pajar la taxa speziala sco er a las disposiziuns davart la sequestraziun da las valurs da facultad. Sco patruna u sco patrun valan tut las persunas, per las qualas pon vegnir applitgadas las disposiziuns penalas. Latiers tutgan oravant tut commembras e commembers dal cussegl d'administraziun, manadras e manaders da fatschenta, procuristas e procurists, contabilistas e contabilists, mandatarias e mandataris sco er persunas che han il dretg da suttascriver. Questas persunas stattan bunas solidaricamain per la realisaziun e per il transferiment correct da las deducziuns dal salari.

Requirentas e requirents d'asil sco er persunas cun basegn da protecziun senza permissiun da dimora che exerciteschan in'activitad da gudogn, ston restituir ils custs (taxa speziala). La taxa speziala serva a cuvrir ils custs totals che vegnan chaschunads da tut questas persunas che exerciteschan in'activitad da gudogn sco er da las confamigliaras e dals confamigliars che vegnan sustegnids d'ellas. L'autoritad chantunala collia la permissiun per l'activitad da gudogn cun ina cundiziun correspundenta. La taxa speziala na dastga betg importar dapli che 10 pertschient da las entradas da la persuna en dumonda. Ella vegn deducida da la patruna u dal patrun directamain da las entradas da la persuna en dumonda e vegn transferida a la confederaziun. L'obligaziun da pajar la taxa speziala dura maximalmain 10 onns a partir dal mument che la persuna en dumonda cumenza per l'emprima giada cun in'activitad da gudogn.

Cumpetenzas / proceder

Il cussegl federal regla ils detagls. El fixescha spezialmain l'autezza da la taxa speziala e relascha prescripziuns davart la procedura da pajament e d'admoniziun. Particularmain tar entradas bassas po el desister da l'obligaziun da pajar la taxa speziala. Las incumbensas che resultan en connex cun l'incassament da la taxa speziala po la confederaziun surdar a terzas persunas.