En general

La Svizra po dar ina protecziun provisoria a persunas che basegnan protecziun per la durada d'ina greva periclitaziun generala, oravant tut durant ina guerra u ina guerra civila sco er en situaziuns da violenza generala. Il cussegl federal decida, sche e tenor tge criteris ch'i po vegnir dà ina protecziun provisoria a gruppas da persunas che basegnan protecziun. Persunas che basegnan protecziun sa trategnan en il chantun, al qual ellas èn vegnidas assegnadas.

Sch'il cussegl federal n'ha anc betg abolì la protecziun provisoria suenter tschintg onns, survegnan las persunas che basegnan protecziun ina permissiun da dimora da quest chantun. La permissiun da dimora è limitada fin che la protecziun provisoria vegn abolida.

Premissas

Durant ils emprims trais mais suenter l'entrada en Svizra na dastgan las persunas che basegnan protecziun betg surpigliar in'activitad da gudogn. Suenter permettan las autoritads chantunalas a las persunas che basegnan protecziun in'activitad da gudogn, premess ch'igl è avant maun ina dumonda d'ina patruna u d'in patrun e premess ch'i vegnan observadas las cundiziuns da salari e da lavur (art. 53 LEst).

Davart ils detagls da la concepziun da las premissas d'admissiun correspundentas decida l'uffizi per industria, mastergn e lavur a temp util.

Chaussas spezialas

La categoria da las persunas che basegnan protecziun è vegnida fixada per l'emprima giada en la nova lescha d'asil dals 26 da zercladur 1998. Questa lescha è entrada en vigur il 1. d'october 1999.