En general

Tar las persunas admessas provisoriamain en Svizra ston ins distinguer tranter las suandantas duas categorias:

Admissiun provisoria individuala

In'admissiun provisoria individuala vegn disponida suenter ina decisiun d'asil negativa, sche la partenza da la persuna refusada en ses pajais d'origin n'è betg pussaivla, betg supportabla u betg admissibla.

Fugitivas e fugitivs admess provisoriamain

Ina persuna estra vegn admessa provisoriamain sco fugitiva u sco fugitiv, sch'ella ademplescha la qualitad da fugitiva u da fugitiv, ma sch'i na la po dentant betg vegnir dà asil, perquai ch'ella è indegna pervi d'acziuns dischapprovablas u perquai ch'ella ha violà u periclitescha la segirezza interna u externa da la Svizra.

Premissas

Tut las persunas admessas provisoriamain sco er las fugitivas ed ils fugitivs admess provisoriamain dastgan da princip surpigliar in'activitad da gudogn. Ellas survegnan uschia ina legitimaziun da persunas estras cun la remartga "senza activitad da gudogn". Quai signifitgescha che la persuna admessa provisoriamain po da princip surpigliar in'activitad da gudogn, ma ch'ella n'ha actualmain nagina plazza.

Cumpetenzas / proceder

La patruna u il patrun sto far la dumonda correspundenta - sur la controlla d'abitantas e d'abitants da la vischnanca da domicil* - a l'uffizi da fatgs da polizia e da dretg civil dal Grischun, partiziun "asil ed execuziun da mesiras". Da qua davent vegn la dumonda tramessa a l'uffizi per industria, mastergn e lavur. Quest uffizi examinescha, sche la patruna u sch'il patrun ha purschì la lavur a las cundiziuns da salari e da lavur dal lieu respectiv e da la branscha respectiva.

La dumonda vegn visada e returnada a l'uffizi da fatgs da polizia e da dretg civil dal Grischun, partiziun "asil ed execuziun da mesiras", nua ch'i vegn finalmain emessa la legitimaziun da persunas estras. Da qua davent arriva la legitimaziun da persunas estras sur la controlla d'abitantas e d'abitants cumpetenta a la persuna admessa provisoricamain. La persuna admessa provisoricamain dastga cumenzar la plazza pir, cur ch'ella è en possess da la legitimaziun da persunas estras.

*En cass che la persuna admessa provisoriamain mida cun l'entrada en plazza il lieu da domicil, uschè è la dumanda dad inoltrar a la vegninta vischnanca da domicil responsabla.