En general

Da princip vegnan las legitimaziuns da persunas estras e da requirentas e da requirents d'asil emessas il pli ditg per sis mais, dentant maximalmain fin al termin da partenza fixà.

Premissas

Durant ils emprims trais mais suenter avair fatg la dumonda d'asil èsi scumandà a las requirentas ed als requirents d'asil da pratitgar in'activitad da gudogn. Las legitimaziuns da persunas estras survegnan correspundentamain la remartga "activitad da gudogn scumandada". Sch'i vegn prendida ina decisiun d'asil negativa entaifer quests emprims trais mais, vegn la legitimaziun da persunas estras prolungada fin al termin da partenza fixà resp. maximalmain per ulteriurs trais mais. Il scumond da lavurar vala pia analogamain vinavant fin a la data correspundenta. Suenter la scadenza da quests (totalmain) sis mais sto la requirenta u il requirent d'asil vegnir admess a l'activitad da gudogn. Ella u el survegn alura ina legitimaziun da persunas estras cun la remartga "senza activitad da gudogn". Quai signifitgescha che la requirenta u ch'il requirent d'asil po da princip surpigliar in'activitad da gudogn, ma ch'ella u ch'el n'ha actualmain nagina plazza.

Sch'i na vegn prendida nagina decisiun d'asil entaifer ils emprims trais mais, vegn la requirenta u il requirent d'asil medemamain admess a l'activitad da gudogn. La legitimaziun da persunas estras vegn prolungada suenter la scadenza dals emprims trais mais per ulteriurs sis mais cun la remartga "senza activitad da gudogn".

Cumpetenzas / proceder

Sche la requirenta u sch'il requirent d'asil ademplescha las premissas fundamentalas per pratitgar in'activitad da gudogn (legitimaziun da persunas estras cun la remartga "senza activitad da gudogn"), sto la patruna u il patrun far la dumonda correspundenta - sur la controlla d'abitantas e d'abitants da la vischnanca da domicil* - a l'uffizi da fatgs da polizia e da dretg civil dal Grischun, partiziun "asil ed execuziun da mesiras". Da qua davent vegn la dumonda tramessa a l'uffizi per industria, mastergn e lavur. Quest uffizi examinescha, sche la patruna u sch'il patrun na chatta betg ina forza da lavur indigena ch'è pronta ed abla da prestar la lavur a las cundiziuns da salari e da lavur dal lieu respectiv e da la branscha respectiva (art. 7 OLE).

Sche l'uffizi per industria, mastergn e lavur arriva a la conclusiun ch'ina forza da lavur indigena possia vegnir assegnada a questa patruna u a quest patrun, relascha el ina disposiziun negativa per mauns da la patruna u dal patrun. Autramain vegn la dumonda visada e returnada a l'uffizi da fatgs da polizia e da dretg civil dal Grischun, partiziun "asil ed execuziun da mesiras", nua ch'i vegn finalmain emessa la legitimaziun da persunas estras. Da qua davent arriva la legitimaziun da persunas estras sur la controlla d'abitantas e d'abitants cumpetenta a la requirenta u al requirent d'asil. La persuna admessa provisoricamain dastga cumenzar la plazza pir, cur ch'ella è en possess da la legitimaziun da persunas estras.

*En cass che la requirenta ni il requirent d'asil mida cun l'entrada en plazza il lieu da domicil, uschè è la dumanda dad inoltrar a la vegninta vischnanca da domicil responsabla.