Requirentas e requirents d'asil: Sco requirentas e requirents d'asil vegnan designadas quellas persunas che han dumandà asil en Svizra e da las qualas la procedura d'asil è anc pendenta.

Fugitivas e fugitivs: Fugitivas e fugitivs èn persunas ch'èn exponidas a dischavantatgs gravants u che han ina tema motivada da vegnir exponidas a tals dischavantatgs en lur patria u en quel pajais, nua ch'ellas vivevan l'ultim, e quai pervi da lur razza, pervi da lur religiun, pervi da lur naziunalitad, pervi da lur appartegnientscha ad ina tscherta gruppa sociala u pervi da lur opiniuns politicas. Fugitivas e fugitivs èn vegnids renconuschids sco tals da las autoritads cumpetentas, q.v.d. lur dumonda d'asil è vegnida respundida en in senn positiv.

Persunas admessas provisoricamain: Sche l'execuziun da l'expulsiun n'è betg admessa, betg raschunaivla u betg pussaivla, regla l'uffizi federal da migraziun (UFM) la relaziun da dimora tenor las disposiziuns legalas davart l'adimissiun provisorica tenor la lescha federala davart la dimora ed il domicil dals esters (LDDE) dals 26 da mars 1931.

In'admissiun provisorica po plinavant vegnir ordinada en cas d'ina situaziun persunala d'urgenza gravanta, sche nagina decisiun d'asil cun vigur legala n'è vegnida relaschada quatter onns suenter l'inoltraziun da la dumonda d'asil.

Persunas, tar las qualas ins n'è betg entrà en la dumonda d'asil, survegnan ina decisiun da betg entrar en chaussa (BEC).