1. En general
Dapi il 1. da zercladur 2009 èn entrads en vigur ils contracts bilaterals extendids per ils novs stadis da la UE-2 Bulgaria e Rumenia. Las burgaisas ed ils burgais da la Bulgaria e da la Rumenia pon cun quai medemamain sa referir a la cunvegna davart la libra circulaziun da persunas resp. a la libra circulaziun da persunas.
Durant il temp transitoric valan per ils novs stadis da la UE-2 Bulgaria e Rumenia las suandantas restricziuns:
- precedenza da las persunas indigenas tar l'occupaziun da plazzas libras;
- controlla dals contracts da lavur en il rom da la procedura da permissiun;
- contingents d'admissiun che vegnan augmentads mintga onn.
2. Precedenza da persunas indigenas
La regulaziun da la precedenza da persunas indigenas signifitgescha ch'ina permissiun da lavur e da dimora per persunas ch'èn burgaisas dals novs stadis da la UE-2 po sulettamain vegnir concedida, sch'ins n'ha betg pudì chattar per la plazza libra ina forza da lavur adattada sin il martgà da lavur indigen. Questa cumprova sto vegnir confermada dal center regiunal per intermediaziun da lavur (CIL).
3. Controlla dals contract da lavur
L'admissiun da forzas da lavur dals novs stadis da la UE-2 è mo pussaivla, sche las cundiziuns da salari e da lavur usitadas al lieu ed en la branscha vegnan respectadas. Questa controlla pretenda in'examinaziun dals contracts da lavur che ston vegnir inoltrads cun la dumonda.
4. Procedura da permissiun
La procedura da permissiun vertenta vala er per ils novs stadis da la UE-2
Per l'admissiun da forzas da lavur dals novs stadis da la UE-2 vala en il chantun Grischun la medema procedura da permissiun sco per las persunas ch'èn burgaisas dal stadis vertents da la UE.
Medem formular da dumonda per tut las persunas ch'èn burgaisas da la UE/AECL
Perquai ch'i vegn duvrà per las persunas ch'èn burgaisas dals novs stadis da la UE-2 indicaziuns supplementaras, avain nus cumplettà il formular da dumonda vertent. Per persunas ch'èn burgaisas dals stadis vertents da la UE/AECL e per persunas ch'èn burgaisas dals novs stadis da la UE-2 sto vegnir utilisà il medem formular. Per persunas cun activitad da gudogn dals novs stadis da la UE-2 ston vegnir fatgas indicaziuns davart la scolaziun resp. davart l'activitad vertenta, davart il dumber d'uras da lavur per emna e davart il salari brut.
Ils novs formulars stattan a disposiziun qua sco documents da PDF. Il nov AUGES (formular da dumonda en furma electronica) po vegnir chargià qua sin l'agen computer. Il formular po vegnir retratg en furma da palpiri tar las controllas d'abitantas e d'abitants.
Agiuntar il contract da lavur dal CIL
Per examinar l'observanza da las cundiziuns da salari e da lavur usitadas en il lieu ed en la branscha per forzas da lavur dals novs stadis da la UE-2 sco er da la precedenza da persunas indigenas ston vegnir agiuntads in contract da lavur sutsegnà dad omaduas partidas e la conferma dal CIL.
5. Procedura d'annunzia mancanta
L'engaschament da persunas ch'èn burgaisas dal novs stadis da la UE-2 è adina suttamessa a l'obligaziun da dumandar ina permissiun. La procedura d'annunzia n'è betg pussaivla per dimorantas e per dimorants a curt termin dals novs stadis da la UE-2.