Persunas estras pon acquistar il dretg da burgais svizzer, sch'ellas adempleschan las premissas legalas per la natiralisaziun. La dumonda sto vegnir inoltrada ensemen cun ils documents necessaris tar l'uffizi da fatgs da polizia e da dretg civil dal Grischun (UPDC), partiziun integraziun, dretg da burgais e dretg civil, Karlihof 4, 7000 Cuira. Suenter in'examinaziun preliminara formala trametta il UPDC la dumonda ensemen cun las actas a la vischnanca burgaisa cumpetenta u – sch'i na dat nagina – a la vischnanca politica. Questa fa las retschertgas ch'èn necessarias per giuditgar las premissas da natiralisaziun e maina in discurs persunal cun la persuna che vul acquistar il dretg da burgais. Davart la garanzia u davart la refusa dal dretg da burgais communal decida l'organ cumpetent da la vischnanca burgaisa u da la vischnanca politica. La decisiun vegn tramessa ensemen cun las actas al UPDC che dumonda – sche tut las premissas da natiralisaziun èn avant maun – la permissiun da natiralisaziun federala tar l'uffizi federal da migraziun (UFM). L'uffizi prepara la decisiun per mauns dal departament da giustia, segirezza e sanitad che decida davart la concessiun u davart la refusaziun dal dretg da burgais chantunal. Il dretg da burgais chantunal survegn vigur giuridica tras la decisiun positiva dal departament. A medem temp vegn acquistà il dretg garantì da burgais communal ed il dretg garantì da burgais svizzer.


Naziunalitad vertenta / dretg da burgais dubel
En intgins stadis ha la natiralisaziun per consequenza che la naziunalitad vertenta va a perder. Sche Vus avais ulteriuras dumondas en quest connex, As adressai per plaschair a l'autoritad cumpetenta da Voss stadi da derivanza. Ulteriuras infurmaziuns survegnis Vus er tar il uffizi federal da migraziun (UFM).


Premissas

Domicil
 

Confederaziun:	12 onns domicil en Svizra, da quels 3 durant ils ultims 5 onns (il temp tranter la vegliadetgna da 10 e 20 onns vegn quintà dubel).
Chantun*:	6 onns, da quels 3 durant il ultims 5 onns.
Vischnanca da domicil*:	tranter 4 fin 12 onns: Infurmaziuns davart la durada da domicil necessaria survegnis Vus tar la vischnanca burgaisa u – sch'i na dat nagina – tar la vischnanca politica da Vossa vischnanca da domicil.
Facilitaziuns:	Per persunas petentas che vivan durant 3 onns en cuminanza matrimoniala cun ina persuna ch'ademplescha la durada da domicil ordinaria e che fa a medem temp ina dumonda da natiralisaziun u ch'è gia vegnida natiralisada suletta, basta in domicil da 5 onns en Svizra, da quels 1 onn avant che far la dumonda. En il chantun* ed en la vischnanca* da domicil e necessari in domicil d'almain 4 onns.

* I vegn mo quintà il temp, durant il qual la petenta u il petent ha gì ina permissiun da dimora permanenta (document da legitimaziun C e B senza permissiuns da scolaras e da scolars u da studentas e da students; document da legitimaziun L mo tar la concessiun en il rom d'ina dimora nuninterrutta).



Qualificaziun
Ina persuna po sulettamain vegnir natiralisada, sch'ella:

• è integrada en la communitad chantunala e communala;
• enconuscha las modas da viver e las relaziuns chantunalas e communalas sco er ina lingua chantunala;
• respecta l'urden giuridic svizzer;
• na periclitescha betg la segirezza interna ed externa da la Svizra; e
• dispona d'ina basa d'existenza segirada.

Formulars; documents necessaris
Ils suandants formulars ston vegnir inoltrads tar il uffizi da fatgs da polizia e da dretg civil dal Grischun (Formulars a dretg):

• Dumonda da natiralisaziun
• Curriculum vitae
• Fegl supplementar concernent lieus da domicil, lieus da scola, plazzas da lavur
• Decleraziun concernent l'observaziun da l'urden giuridic
• L'attestaziun da taglia

Documents:
A la dumonda da natiralisaziun ston vegnir agiuntads ils exemplars originals u las copias legalisadas uffizialmain dals documents. Las copias legalisadas uffizialmain survegnis Vus tar ina notara patentada resp. tar in notar patentà, tar ina notara cirquitala resp. tar in notar cirquital u tar ina chanzlista communala resp. tar in chanzlist communal. Resguardai per plaschair ch'ils documents na pon betg vegnir restituids.

Ils documents na dastgan per regla betg esser pli vegls che sis mais. Sch'els n'èn betg avant maun en lingua rumantscha, tudestga, taliana u franzosa ston els vegnir munids cun ina translaziun legalisada uffizialmain.

• Copia da la legitimaziun da persunas estras per tut las persunas ch'èn involvidas en la dumonda
• Attests da domicil per tut las persunas ch'èn involvidas en la dumonda
• Cumprova dal status da dimora durant la durada da domicil necessaria per tut las persunas ch'èn involvidas en la dumonda
• Attest da naziunalitad per tut las persunas ch'èn involvidas en la dumonda sco er per la conjugala u per il conjugal che n'è betg involvì
• Divers documents davart il stadi civil
• Documents davart la midada dal num per tut las persunas ch'èn involvidas en la dumonda, sch'ina midada da num è vegnida fatga dapi la naschientscha
• Sentenzia giudiziala davart la schliaziun u davart la decleranza da nunvalaivladad da la lètg anteriura cun indicaziun da la data da la vigur legala tar petentas u tar petents ch'èn divorziads u ch'eran maridads nunvalaivlamain
• Extract dal register penal svizzer per la petenta u per il petent sco er per la conjugala u per il conjugal ch'è involvì en la dumonda
• Contract da lavur resp. contract d'emprendissadi actual per tut las persunas cun activitad da gudogn en la famiglia
• Extract dal register da scussiun per ils ultims 5 onns per la petenta u per il petent sco er per la conjugala u per il conjugal
• Indicaziuns davart eventuals debits da la petenta u dal petent sco er da la conjugala u dal conjugal
• Cumprova d'avair la tgira genituriala en cas da constataziuns da la paternitad, da renconuschientschas u d'adopziuns (attests da renconuschientscha, sentenzias giudizialas e.u.v.) per la petenta u per il petent, sche persunas minorennas èn involvidas
• Consentiment en scrit da l'autoritad tutelara tar petentas u tar petents avugadads