Burgaisas e burgais grischuns pon acquistar il dretg da burgais communal da lur vischnanca da domicil. Per dumondas As drizzai per plaschair a la vischnanca burgaisa u – sch'i na dat nagina – a la vischnanca politica da Vossa vischnanca da domicil.

Persunas svizras pon acquistar il dretg da burgais chantunal ed il dretg da burgais communal da lur vischnanca da domicil, sch'ellas adempleschan las premissas legalas per ina natiralisaziun. La dumonda sto vegnir inoltrada ensemen cun ils documents necessaris tar la vischnanca burgaisa u – sch'i na dat nagina – tar la vischnanca politica da Vossa vischnanca da domicil. La vischnanca burgaisa u la vischnanca politica fa las retschertgas ch'èn necessarias per giuditgar las premissas da natiralisaziun. Davart la garanzia u davart la refusa dal dretg da burgais communal decida l'organ cumpetent da la vischnanca burgaisa u da la vischnanca politica.

La decisiun vegn tramessa ensemen cun las actas a l'uffizi da fatgs da polizia e da dretg civil dal Grischun che fa – sche necessari – scleriments supplementars. L'uffizi prepara la decisiun per mauns dal Departament da giustia, segirezza e sanitad che decida davart la concessiun u davart la refusaziun dal dretg da burgais chantunal. Il dretg da burgais chantunal survegn vigur giuridica tras la decisiun positiva dal departament. A medem temp vegn acquistà il dretg da burgais communal.

Ils formulars dals dretg da burgais ein da retrair sulettamain per tudestg u talian. Nus engraziain per Vossa chapientscha.


Dretgs da burgais vertents
En intgins chantuns ha la concessiun dal dretg da burgais communal e chantunal per consequenza ch'ils dretgs da burgais vertents van a perder. Sche Vus avais dumondas en quest connex, As adressai per plaschair a l'autoritad cumpetenta dal chantun, nua che Vus possedais il dretg da burgais.
 

Premissas

Domicil

Chantun:	6 onns, da quels 3 durant il ultims 5 onns.
Vischnanca da domicil:	tranter 4 fin 6 onns: Infurmaziuns davart la durada da domicil necessaria survegnis Vus tar la vischnanca burgaisa u – sch'i na dat nagina – tar la vischnanca politica da Vossa vischnanca da domicil.
Facilitaziuns:	Per persunas petentas che han in genitur che posseda il dretg da burgais chantunal tras derivanza u che vivan durant 3 onns en cuminanza matrimoniala cun ina persuna ch'ademplescha la durada da domicil ordinaria e che fa a medem temp ina dumonda da natiralisaziun u ch'è gia vegnida natiralisada suletta, basta in domicil da 4 onns en il chantun ed en la vischnanca da domicil.

Qualificaziun
Ina persuna po sulettamain vegnir natiralisada, sch'ella:

 

• Ina persuna po sulettamain vegnir natiralisada, sch'ella:
• è integrada en la communitad chantunala e communala;
• enconuscha las modas da viver e las relaziuns chantunalas e communalas sco er ina lingua chantunala;
• respecta l'urden giuridic svizzer;
• na periclitescha betg la segirezza interna ed externa da la Svizra; e
• dispona d'ina basa d'existenza segirada. 

Formulars; documents necessaris
Ils suandants formulars ston vegnir inoltrads ensemen cun ils documents necessaris tar la vischnanca burgaisa cumpetenta – sch'i na dat nagina – tar la vischnanca politica (Formulars a dretg):

• Dumonda da natiralisaziun
• Curriculum vitae
• L'attestaziun da taglia

 

Documents:
A la dumonda da natiralisaziun ston vegnir agiuntads ils exemplars originals u copias ch'èn vegnidas legalisadas uffizialmain. Las copias legalisadas uffizialmain survegnis Vus tar ina notara patentada resp. tar in notar patentà, tar ina notara cirquitala resp. tar in notar cirquital u tar ina chanzlista communala resp. tar in chanzlist communal. Resguardai per plaschair ch'ils documents na pon betg vegnir restituids.

Ils documents na dastgan per regla betg esser pli vegls che sis mais. Sch'els n'èn betg avant maun en lingua rumantscha, tudestga, taliana u franzosa ston els vegnir munids cun ina translaziun legalisada uffizialmain.

• Attest da stadi civil per petentas e per petents nubils
• Certificat da famiglia per petentas e petents maridads, vaivs u divorziads
• Attest da domicil per tut las persunas ch'en involvidas en la dumonda
• Extract dal register penal svizzer per tut las persunas davent 10 onns ch'èn involvidas en la dumonda
• Extract dal register da scussiun e da concurs per ils ultims tschintg onns per las petentas e per ils petents sco er per las conjugalas resp. ils conjugals
• Indicaziuns davart eventuals debits per la petenta u per il petent sco er per las conjugalas resp. ils conjugals