Il chantun Grischun cuntinuescha er ils proxims 4 onns cun il program d'acziun "grischun en moviment". Quai ha concludì la regenza grischuna, ed ella ha approvà il concept davart la planisaziun detagliada e davart la realisaziun dal program "Pais saun en il Grischun 2012–2015".
Il program è vegnì lantschà l'onn 2008 per impedir che adina dapli uffants e giuvenils hajan surpais. Sin basa dals emprims resultats positivs dal project "grischun en moviment" e pervia da las consequenzas gravantas dal surpais per la sanadad e per l'economia publica cunvegni – tenor l'avis da la regenza – da prolungar il program per 4 onns. Fin ussa han pudì vegnir realisads tut ils 18 projects parzials planisads. Uschia han per exempel 47 pertschient da las vischnancas fatg part dals projects parzials "Cupitgarola" u "Scola en moviment".
En la segunda fasa dal program ils onns 2012 fin 2015 èn previs totalmain 21 ulteriurs projects. Per realisar "grischun en moviment" tenor il plan vegnan budgetads custs totals da circa 4 milliuns francs per questa fasa. La promoziun da la sanadad Svizra sa participescha previsiblamain cun ina contribuziun da totalmain 880'000 francs al project. Cunquai che l'organisaziun vertenta dal program è sa cumprovada, duai ella vegnir mantegnida. La responsabladad ha l'uffizi da sanadad.