Nova basa per ina planisaziun dals ospitals orientada a las prestaziuns

Tras ina revisiun parziala da la lescha per promover la tgira da persunas malsaunas duain ils criteris, ch'èn decisivs per elavurar la planisaziun dals ospitals tenor la revisiun da la lescha federala davart l'assicuranza da malsauns, ma er las pretensiuns ch'ils ospitals ston ademplir per vegnir inscrits sin la glista dals ospitals, vegnir francads en il chantun Grischun sin il stgalim da la lescha. Ina impurtanza speziala survegnan – tenor las prescripziuns da la confederaziun – ils criteris "qualitad" e "rentabilitad". La regenza grischuna ha avert la consultaziun tar la revisiun parziala da la lescha.

La planisaziun dals ospitals actuala dal chantun Grischun datescha da l'onn 2002 ed è vegnida deliberada quella giada da la regenza. La glista dals ospitals dal chantun, che sa basa sin questa planisaziun e ch'è medemamain vegnida relaschada da la regenza, è vegnida adattada differentas giadas dapi lura. La glista cuntegna las incaricas da prestaziun per ils ospitals e per las clinicas sco er ils dumbers da letgs per pazientas e per pazients che als vegnan attribuids. Questa planisaziun dals ospitals, che sa referescha a las capacitads, ed er questa glista dals ospitals ston vegnir remplazzadas fin il pli tard il 1. da schaner 2015 pervia dal nov dretg federal. La revisiun da la lescha federala davart l'assicuranza da malsauns pretenda che las planisaziuns chantunalas dals ospitals vegnian fatgas s'orientond a las prestaziuns e vul ch'ellas sa basian sin cumparegliaziuns da manaschis che resguardan la qualitad e la rentabilitad.

Ils criteris per elavurar la nova planisaziun dals ospitals respectivamain per repassar la planisaziun dals ospitals vertenta e las pretensiuns ch'ils ospitals e las clinicas ston ademplir per vegnir inscrits sin la glista dals ospitals, duain vegnir fixads da nov sin il stgalim da la lescha. La finamira è er vinavant quella che la populaziun disponia d'in provediment medicinal d'auta qualitad. La glista dals ospitals duai plinavant procurar ch'i dettia tranter ils furniturs da prestaziuns ina concurrenza reglada sut las medemas premissas. Per promover la concurrenza prevesa il sboz da consultaziun che la regenza po er surdar incaricas da prestaziun che surpassan il basegn. La regenza prevesa da profitar da questa pussaivladad en spezial tar ospitals pli pitschens en il chantun, sch'els giavischan quai. Els ston dentant cumprovar d'ademplir las premissas infrastructuralas e persunalas che vegnan pretendidas areguard la qualitad per las purschidas ch'els giavischan.