Sa basond sin l'art. 11 al. 1 lit. a da las disposiziuns executivas davart l'organisaziun dal servetsch da salvament dals 9 da november 2004 vegn la permissiun concedida, sche las directivas naziunalas u internaziunalas per il tip da salvament respectiv vegnan ademplidas. Quai munta per ils servetschs da salvament e per las basas d'ambulanza ch'i stoppia da princip esser avant maun ina renconuschientscha dal'interassociaziun per il salvament (IAS) valaivla.
Servetschs da salvament cun renconuschientscha da la IAS
Servetschs da salvament che disponan d'ina renconuschientscha da la IAS valaivla, ston inoltrar – ensemen cun la dumonda per laschar renovar la permissiun – la renconuschientscha da la IAS (ina copia) plus il rapport annual dals ultims dus onns. Dal formular da dumonda Permissiun da transport Grischun sto mo vegnir emplenida l'emprima pagina.
Servetschs da salvament senza renconuschientscha da la IAS
Per ils servetschs da salvament e per las basas d'ambulanza che na disponan betg anc d'ina renconuschientscha da la IAS stat a disposiziun in formular da dumonda Permissiun da transport Grischun, dal qual è vesaivel, tge puncts che ston esser ademplids en tge dimensiun per pudair laschar renovar la permissiun. Ils documents pretendids ston vegnir agiuntads. Sco basa per il giudicament valan las "Directivas da la IAS per la renconuschientscha dals servetschs da salvament" dals 11 da december 2009. Tar il giudicament vegn mess l'accent sin ils criteris structurals (cifra 1) e procedurals (cifra 2).
Servetschs da salvament pitschens e basas d'ambulanza senza renconuschientscha da la IAS
Per incumbensa da la cumissiun chantunala da salvament ha la gruppa da lavur qualitad mussà la situaziun dal chantun Grischun concernent il provediment preclinic en il rapport "Analisa – status dals servetschs da salvament e da las basas d'ambulanza" dals 14 d'avrigl 2008. Plinavant ha ella explitgà en quest rapport per tgenins servetschs da salvament e per tgeninas basas d'ambulanza ch'ina renconuschientscha da la IAS saja plitost pauc probabla. Sa basond sin quella analisa vegnan applitgadas per quests servetschs da salvament "pitschens" e per las basas d'ambulanza las "Directivas davart la renconuschientscha dals servetschs da salvament pitschens e da las basas d'ambulanza en il chantun Grischun" dals 15 da december 2009.
Quests servetschs da salvament pitschens e questas basas d’ambulanza ston emplenir il formular da dumonda Permissiun da transport Grischun ed inoltrar ils documents pretendids.
Servetsch da transport da las telefericas
Ils servetschs da transport da las telefericas ston emplenir il formular da dumonda Permissiun da transport Grischun ed inoltrar ils documents pretendids.
Sustegniment da las basas d'ambulanza tras il servetsch da salvament
Nus supplitgain ils servetschs da salvament che disponan d'ina u da pliras basas d'ambulanza en lur regiun d’ospital da sustegnair la basa d'ambulanza tar l'elavuraziun dals documents concernent la renovaziun da la permissiun dal transport professiunal.
Termin d'inoltraziun
La dumonda davart la renovaziun da la permissiun per far transports da pazientas e da pazients cunter ina indemnisaziun en il chantun Grischun sto vegnir inoltrada ensemen cun ils documents pretendids fin ils 30 da zercladur 2010.
Gesuchsformular Transportbewilligung
Gesuchsformular Transportbewilligung