Il care team grischun garantescha che persunas, ch'èn traumatisadas fermamain tras eveniments dal mintgadi, tras catastrofas e tras situaziuns d'urgenza, sco er lur confamigliaras e lur confamigliars survegnian in emprim sustegn u agid psicologic graduà. Reacquistar segirezza tras structuras, tras infurmaziun e tras protecziun ed uschia pia reacquistar il quità per sasez resp. sa reintegrar en l'incumbensa u en l'activitad da fin ussa, quai stat en il center. La finamira è quella da chattar svelt la via enavos en il mintgadi. Nua che quai è necessari vegni renvià a las resursas dal sectur da la sanadad e recumandà in tractament u in accumpagnament a pli lunga vista (= prevenziun secundara). La lavur dal care team duai gidar a prevegnir ad eventuals disturbis posttraumatics da stress (DPTS).

In disturbi posttraumatic da stress è in sindrom che po sa mussar tar persunas ch'èn stadas confruntadas cun in eveniment traumatic, durant il qual ellas han gì gronda tema e sgarschur u èn sa sentidas inablas da gidar sasezzas. Tals eveniments sa repetan silsuenter savens en regurdientschas ed en nauschs siemis mulestants. Plinavant tutgan latiers sintoms sco per exempel disturbis dal sien, problems da sa concentrar, temelitgadad, gnervusitad e stadis da tema che duran passa 3 mais. In DPTS restrenscha fermamain la qualitad da viver da las persunas pertutgadas. Savens emprovan persunas pertutgadas da mitigiar lur suffrientschas faschond abus d'alcohol, da medicaments u da drogas. Senza tractament po la malsogna daventar cronica (durant onns u schizunt durant decennis).