Il care team grischun exista dapi il settember 2004. Las commembras ed ils commembers dal care team grischun na prestan betg servetsch da pichet. Ellas ed els vegnan clamads en acziun tras la centrala dal clom d'agid sanitar 144 che observa en quest connex la glista indicativa.

Il care team grischun sco tal sa cumpona da persunas spezialisadas da las gruppas professiunalas psicologia, psichiatria, lavur sociala e pastoraziun da domaduas baselgias chantunalas. En tut stattan a disposiziun circa 60 commembras e commembers; circa 50 èn scolads sco "care givers" tenor las directivas d'intervenziun e tenor ils standards da scolaziun per agid psicologic d'urgenza da la rait naziunala per l'agid psicologic d'urgenza (RNAPU). 12 psicologas e psicologs per cas d'urgenza èn medemamain scolads tenor ils standards da la RNAPU (scolaziun supplementara en agid psicologic d'urgenza da la federaziun svizra da las psicologas e dals psicologs, FSP).

Organisatoricamain è il care team grischun suttamess a l'uffizi da militar e da protecziun civila che appartegna da sia vart al departament da giustia, segirezza e sanadad.

Mintga onn ston las commembras ed ils commembers dal care team grischun frequentar in perfecziunament d'almain 1 di.

Il care team grischun è vegnì certifitgà ils 5 da mars 2009 tras la rait naziunala per l'agid psicologic d'urgenza e tras il servetsch sanitar coordinà.
 
Zertifikat 
Konzeption