Permiss da manischar en il format da carta da credit (PCC)

Dapi il 1. d'avrigl 2003 vegn emess il nov permiss da manischar en il format da carta da credit. Quel na cuntegna nagina adressa pli. En cas che Vus giais a star en in auter chantun, na stuais Vus betg pli laschar remplazzar il permiss da manischar. Midadas d'adressa stuais Vus dentant adina annunziar a noss uffizi u a l'uffizi per il traffic sin via da Voss nov chantun da domicil (en il Grischun basta ina communicaziun per telefon). 

In nov permiss da manischar sto vegnir emess en ils suandants cas:

• midada dal num e/u dal lieu d'origin (per plaschair preschentar ina carta d'identitad u – en cas d'ina spediziun postala – agiuntar ina copia da la carta d'identitad al formular da dumonda)

• acquist d'ina categoria supplementara u renunzia ad ina categoria existenta

• suenter ch'il permiss è vegnì prendì davent

Il PCC ha blers avantatgs:

• La protecziun da datas è garantida: il PCC na cuntegna nagin chip che permettess d'arcunar datas electronicas

• Segirezza optimala cunter falsificaziuns tras caracteristicas da segirezza integradas

• Armonisaziun europeica da las categorias

• Format pratic

• Il PCC tegna ditg, sch'el vegn tractà adequatamain

Barattar il permiss da manischar blau fin ils 31 d'october 2024

Sche Vus vulais barattar Voss permiss da manischar blau cun in permiss da manischar en format da carta da credit, stuais Vus emplenir il formular «Emissiun d'in nov permiss da manischar» (en tudestg) ed al trametter a nus ensemen cun il permiss da manischar blau.

Tenor la communicaziun a las medias dal Cussegl federal ston las possessuras ed ils possessurs d'in permiss da manischar blau barattar quel cun in permiss en format da carta da credit fin il pli tard ils 31 d'october 2024.

Il permiss da guidar bartgas blau exista er vinavant mo en format da palpiri e na po betg vegnir integrà en il permiss da manischar en format da carta da credit.

Definiziun categorias

Las definiziuns singulas da las categorias dal permiss da manischar ed ulteriuras infurmaziuns tar autorisaziuns e restricziuns en il permiss da manischar anflais Vus qua.