Sche Vus avais pers ils numers d'immatriculaziun u sche quels èn vegnids engulads, stuais Vus immediatamain communitgar quai a noss uffizi – er per Vossa atgna protecziun. Duvrai per quest intent il formular "Annunzia da numers d'immatriculaziun pers".
Resguardai per plaschair il suandant:
1. Sche Voss vehichel è equipà per ordinari cun dus numers d'immatriculaziun (in davant ed in davos), vala il suandant:
- Sche mo il numer davant è ì a perder, laschain nus fabritgar per Vus – cunter ina taxa – in nov numer (cun las medemas cifras) suenter la scadenza da 30 dis dapi che la perdita è vegnida annunziada.
- Sch'il numer davos è percunter ì a perder, na po quel betg vegnir remplazzà. En quest cas As vegnan attribuids – cunter ina taxa – novs numers d'immatriculaziun (cun autras cifras) suenter la scadenza da 30 dis dapi che la perdita è vegnida annunziada.
- Sche omadus numers d'immatriculaziun èn ids a perder, dastga il vehichel vegnir mess en circulaziun pir, suenter che Vus avais survegnì – cunter ina taxa – in nov pèr da numers (cun autras cifras).
2. Sche Voss vehichel è equipà per ordinari mo cun in numer d'immatriculaziun, dastga il vehichel vegnir mess en circulaziun pir, suenter ch'el ha survegnì in nov numer.
Ils numers d'immatriculaziun pers vegnan publitgads en il RIPOL (sistem informatisà da retschertga da la confederaziun) durant 2 onns. Suenter la scadenza da quests 2 onns laschain nus fabritgar per Vus Voss numers vegls. Quai sin Voss giavisch e cunter ina taxa.