Vehichels a motor vegnan immatriculads provisoricamain, sch'els èn staziunads mo temporarmain u mo anc per in temp limità en Svizra.
Cas d'applicaziun d'immatriculaziuns provisoricas:
- Vehichels a motor betg daziads (numers cun in Z)
Vehichels a motor betg daziads dastgan vegnir immatriculads mo provisoricamain e mo cun il consentiment da las autoritads da duana.
- Immatriculaziun da vehichels a motor che duain vegnir exportads
Vehichels a motor che duain vegnir exportads èn medemamain suttamess a l'immatriculaziun provisorica.
Disposiziuns d'admissiun:
Il document dal vehichel vegn limità sin la fin dal mais d'immatriculaziun. Sch'il mais dura mo pli 4 dis chalendars u damain, po la possessura u il possessur dal vehichel dumandar in'extensiun da la limitaziun fin la fin dal mais suandant. La valaivladad na dastga dentant mai surpassar 35 dis chalendars.
Autras prolungaziuns da la valaivladad ed admissiuns repetidas per il medem vehichel n'èn betg pussaivlas. Er midadas da vehichel n'èn betg permessas per quests numers d'immatriculaziun limitads.
Ina garascha cun numers d'immatriculaziun grischuns cun in U sto confermar ch'il vehichel saja segir, sche l'emprima immatriculaziun è stada avant passa 10 onns e sche l'ultima controlla ha gì lieu avant passa 1 onn.
Premias d'assicuranza, taglias da traffic e taxas per l'export:
La possessura u il possessur d'in vehichel che giavischa ina immatriculaziun provisorica per exportar ses vehichel po sa participar a l'assicuranza collectiva chantunala da responsabladad.
Avant che retschaiver il document dal vehichel ed ils numers d'immatriculaziun ston vegnir pajadas:
- la premia d'assicuranza (che sa drizza tenor las tariffas che ans vegnan mintgamai messas a quint da la societad d'assicuranza)
- la taglia da traffic ch'è decisiva per il tip da vehichel respectiv, ed eventualmain la taxa sin il traffic da camiuns pesants sco er
- las taxas per il document dal vehichel, per ils numers d'immatriculaziun e per ina carta internaziunala d'assicuranzas (carta verda)