Sche Vus vulais survegnir per l'emprima giada in permiss per emprender a manischar per ina tscherta categoria, stuais Vus As preschentar persunalmain tar la controlla d'abitantas e d'abitants / administraziun communala da la vischnanca da domicil u tar l'uffizi per il traffic sin via, nua che Vus suttamettais il formular da dumonda emplenì e suttascrit e mussais in document d'identitad valaivel cun fotografia (carta d'identitad u passaport). La controlla d'abitantas e d'abitants / administraziun communala (u l'uffizi per il traffic sin via) examinescha Vossa identitad e conferma quella cun in bul e cun ina suttascripziun. Alura trametta ella il formular da dumonda cun ils documents appartegnents a noss uffizi.

Vus pudais retrair ils formulars da dumonda tar las controllas d'abitantas e d'abitants / administraziuns communalas u tar l'uffizi per il traffic sin via. Vus pudais er chargiar giu ils formulars sco datoteca da PDF (vesair sut formulars) ed als emplenir al computer (duvrai per plaschair mo palpiri alv per stampar).

Avant che inoltrar la dumonda stuais Vus laschar controllar Vossa vesida tras in'opticra u tras in opticher autorisà (ubain tras ina media u tras in medi). Il resultat vegn scrit directamain sin il formular da dumonda. Quest test na sto betg vegnir fatg, sche Vus avais gia in permiss da manischar d'ina autra categoria e sche l'examen correspundent ha gì lieu avant main che 2 onns.

Las agiuntas necessarias èn menziunadas sin il formular da dumonda.

Resguardai per plaschair:

• Nus dastgain surdar il permiss per emprender a manischar pir suenter che l'examen da teoria è vegnì fatg cun success.
• In examen da teoria reussì vala per 2 onns. Suenter sto el vegnir repetì, nun che Vus possedias gia in permiss da manischar che premetta in examen da teoria equivalent.
• La valaivladad dal permiss per emprender a manischar è limitada. Ella po vegnir prolungada mo per singulas categorias, e quai mo ina giada. Sco prolungaziun vala mintga extensiun (nuninterrutta) da la valaivladad. Tras lescha na dastgain nus conceder naginas ulteriuras prolungaziuns, er betg pervia da malsogna, da dimora a l'exteriur, da servetsch militar e.u.v.
• In nov permiss per emprender a manischar da la medema categoria po vegnir dumandà mo da persunas che valan sco ablas da manischar sin basa d'in test da l'autoritad d'admissiun u da persunas che n'han – suenter la scadenza da la valaivladad da l'emprim permiss per emprender a manischar – betg anc duvrà tut las pussaivladads da far examen.
  
  

Diever dal permiss per emprender a manischar a l'exteriur
Sche Vus vulais viagiar cun il permiss per emprender a manischar a l'exteriur, As infurmai per plaschair tar la represchentanza cumpetenta u tar il post da cunfin davart las prescripziuns che valan en il stadi ester respectiv. Da princip As cussegliain nus dentant da far nagins viadis d'autoscola a l'exteriur.