Avais Vus pers Voss permiss per emprender a manischar, Voss permiss da manischar u Voss document dal vehichel? Alura stuais Vus laschar emetter in duplicat correspundent u – en cas dal permiss da manischar en il format da carta da credit – in nov exemplar.
Per quest intent As supplitgain nus d'ans inoltrar ils suandants documents:
- en mintga cas il formular "Annunzia da permiss e da documents pers" (che po vegnir emplenì al computer)
- sch'il permiss da manischar blau è ì a perder, stuais Vus er inoltrar il formular "Dumonda da remplazzar il permiss da manischar blau tras in permiss da manischar en il format da carta da credit" ed ultra da quai ina fotografia da passaport
- per il permiss per emprender a manischar duvrain nus adina er ina nova fotografia da passaport
Resguardai per plaschair en mintga cas il suandant:
Sche Vus vulais retrair il duplicat a noss spurtegl, stuais Vus preschentar – per motivs da segirezza – in document uffizial cun fotografia (passaport, carta d'identitad, legitimaziun da persunas estras e.u.v.). I n'è dentant betg adina pussaivel per nus da liquidar immediatamain tut las dumondas.
Sco possessura u possessur d'in duplicat dal document dal vehichel avais Vus l'obligaziun d'ans returnar quel entaifer 14 dis suenter avair chattà l'original.
Sch'i vegn emess in nov permiss da manischar u in nov permiss per emprender a manischar, perda il permiss vegl sia valaivladad e na dastga betg pli vegnir duvrà. Sch'il permiss remplazzà vegn puspè chattà, stuais Vus returnar quel (e betg il duplicat) entaifer il medem termin.