Poss jau divider la durada da la privaziun, p.ex. en cas d'ina privaziun da 2 mais cun dar giu il permiss 1 mais il schaner ed 1 mais il mars?

Na. La legislaziun davart il traffic sin via n'enconuscha naginas disposiziuns che permettessan d'etappar l'execuziun.

Èsi permess da far viadis puramain professiunals durant la privaziun dal permiss da manischar?

Na. Tenor l'art. 33 al. 1 da l'ordinaziun davart l'admissiun al traffic (OAT) chaschuna la privaziun dal permiss per emprender a manischar u dal permiss da manischar d'ina tscherta categoria (art. 3 al. 1) u sutcategoria (art. 3 al. 2) er la privaziun dal permiss per emprender a manischar u dal permiss da manischar da tut las categorias u sutcategorias.

Pertge vegn – ultra da la multa – anc prendì davent il permiss da manischar resp. pronunziada ina mesira?

Sch'i na sa tracta betg d'in surpassament minimal da las reglas da traffic, chaschuna ina cuntravenziun cunter la legislaziun davart il traffic sin via (lescha federala davart il traffic sin via ed ordinaziuns appartegnentas) duas differentas proceduras ch'èn da princip independentas ina da l'autra: la procedura penala (multa) che vegn realisada da l'autoritad da persecuziun penala dal lieu, nua che la cuntravenziun è vegnida commessa, e la procedura administrativa (avertiment, privaziun dal permiss e.u.v.) ch'è chaussa da l'autoritad administrativa. En tuttas duas proceduras ston vegnir surpigliads ils custs.
Cun auters pleds: in surpassament da las reglas da traffic chaschuna adina duas proceduras independentas che vegnan realisadas a medem temp da duas differentas instanzas. Tuttas duas instanzas survegnan il medem rapport da la polizia.

• La derschadra u il derschader dal lieu, nua che la cuntravenziun è vegnida commessa, sto decider davart l'autezza dal chasti (multa e/u chasti che privescha da la libertad, inscripziun en il register penal).
• L'autoritad administrativa dal chantun da domicil decida davart eventualas mesiras administrativas (avertiment, privaziun dal permiss e.u.v.).
  
  

Dastg jau manar in vehichel a l'exteriur durant ina privaziun dal permiss da manischar?

Na. Per manar in vehichel ston ins posseder in permiss da manischar da la categoria respectiva. Er per manar vehichels a motor a l'exteriur dovri da princip in permiss da manischar valaivel. Il permiss da manischar vegn emess da quel stadi, nua che la manischunza u il manischunz ha ses domicil. Quest permiss da manischar vegn da princip renconuschì er en auters stadis. Sche l'autoritad emettenta prenda pia davent il permiss da manischar d'ina manischunza u d'in manischunz, croda er la permissiun da manischar a l'exteriur.