Tge è in sistem d'infurmaziun geografica?
In sistem d'infurmaziun geografica (SIG) è in instrument sin basa dal computer per preschentar e per analisar chaussas che existan resp. che succedan sin il mund e che stattan en connex cun il territori. La tecnologia dal SIG cuntegna operaziuns d'ina banca da datas sco dumondas u analisas statisticas cun la pussaivladad da far in'analisa geografica ed ina preschentaziun en furma da chartas geograficas. Questas capacitads distinguan il sistem d'infurmaziun geografica d'auters sistems d'infurmaziun ed al fan daventar in instrument prezius per declerar eveniments, per scuvrir tendenzas, per far planisaziuns strategicas e.u.v.


Tgeninas èn las caracteristicas spezialas d'in sistem d'infurmaziun geografica?
Las infurmaziuns geograficas u territorialas sa basan sin in sistem da referenza geografic communabel (sistem da projecziun resp. da coordinatas). Tras questa basa communabla pon vegnir messas en relaziun tut las infurmaziuns registradas independentamain ina da l'autra. Il sistem da referenza furma per uschè dir l'element da colliaziun communabel, la clav. Questa via eleganta per pudair metter en relaziun infurmaziuns independentas tras in sistem da referenza geografic communabel chaschuna dentant intgins problems en la pratica. Per l'ina existan differents sistems da projecziun e da coordinatas sin il mund. Quests sistems ston vegnir accordads periodicamain pervi da las metodas da mesiraziun adina pli exactas e pervi dals process tectonics. Per l'autra è la registraziun geografica d'objects colliada cun custs considerabels ed i dat pliras funtaunas da sbagls pussaivlas. Per pudair reproducir las relaziuns geograficas – en ina furma uschè vardaivla e relativa a l'applicaziun sco pussaivel – en il sistem d'infurmaziun, stoi vegnir dà suffizientamain attenziun al scleriment da quests problems per constituir in SIG ed i duain vegnir fixadas normas adattadas.

La furma dals singuls objects po vegnir represchentada tenor basegn cun in punct, cun ina lingia u cun ina surfatscha. Ils objects pon pia er vegnir preschentads en moda geometrica. La communicaziun visuala è la furma la pli potenta per transmetter e per analisar infurmaziuns. Perquai è la realisaziun e l'interpretaziun visuala da quantitads da datas u da geometrias cumplexas la metoda cun il success il pli grond per promover la chapientscha da connexs globals.

Al sistem tecnic che vegn duvrà per elavurar las datas geograficas vegnan dentant fatgas pretensiuns considerablas. La preschentaziun da las infurmaziuns geograficas en furma da chartas u da products sumegliants a chartas – sco sin palpiri, sin il monitur u sin ina taila da projecziun – sto satisfar a las pretensiuns qualitativas (colurs, dissoluziun, precisiun geometrica, spertadad, simbolica e.u.v.) da las lecturas e dals lecturs.

L'elavuraziun geometrica da las datas geograficas (calculaziun da tagls, vischinanzas, rotaziun, transfurmaziun da vecturs en retagls e vice-versa e.u.v.) pretenda algoritmus spezials. Quests algoritmus ston esser corrects, fidads ed effizients, ston ademplir l'exactadad dumandada da calculaziun, ston minimalisar multiplicaziuns da sbagls, ston esser robusts visavi inconstanzas¹ logicas chaschunadas da pitschens sbagls numerics e duain dumagnar tut las constellaziuns geograficas ed ina quantidad da datas illimitada.

Questas qualitads spezialas dals sistems d'infurmaziun geografica èn stadas la causa ch'ellas n'han fin uss betg pudì vegnir schliadas cun las tecnologias da standard.

La software che vegn duvrada en sistems d'infurmaziun geografica na vegn betg mo applitgada en sistems d'infurmaziun sco menziunà qua survart, mabain po er vegnir applitgada sco instrument d'analisa per datas territorialas, sco per exempel en programs da statistica. Ils cunfins tranter quests dus champs d'applicaziun èn culants. L'organisaziun, ils models da datas ed er l'infrastructura demussan differenzas correspundentas.


Tge datas èn avant maun en il sistem d'infurmaziun geografica da l'administraziun chantunala dal Grischun?
En il sistem d'infurmaziun geografica da l'administraziun chantunala dal Grischun vegnan conservadas datas che gidan ad ademplir incumbensas chantunalas, sco p.ex. datas davart la selvicultura, davart la protecziun da la natira e da la cuntrada, davart la planisaziun dal territori, davart la protecziun da l'ambient, davart la mesiraziun uffiziala e.u.v.


Nua sa chatta il sistem d'infurmaziun geografica da l'administraziun chantunala dal Grischun?
L'infrastructura dal sistem d'infurmaziun geografica dal Grischun vegn furnida dal center da cumpetenza dal SIG. Il center da cumpetenza dal SIG è ina partiziun da l'uffizi d'agricultura, meglieraziun da structura e mesiraziun e furnescha en emprima lingia servetschs a l'intern da l'administraziun.