En collavuraziun cun l'uffizi federal d'abitaziuns (UFAB) è il UAG cumpetent per la promoziun da la construcziun d'abitaziuns e da la proprietad (CAP). La CAP è vegnida terminada per ils 31 da december 2001. Quai n'ha dentant nagina influenza sin ils agids ch'èn vegnids garantids avant.
Sut il titel da la CAP èn vegnids subvenziunads en tut las regiuns dal chantun Grischun objects da proprietad ed abitaziuns da locaziun, cun l'intent da stgaffir spazi d'abitar favuraivel per persunas e per famiglias en relaziuns finanzialas modestas.
Il sustegn da la confederaziun preveseva garanzias, pajaments anticipads rembursabels e contribuziuns à fonds perdu. Per objects da proprietad pudeva mintgin da quests agids vegnir dumandà en moda singula u cumbinada, per las abitaziuns da locaziun stuevan vegnir cumbinads ils agids. Las garanzias ed ils pajaments anticipads per la reducziun dal tschains da locaziun u da las grevezzas da las proprietarias e dals proprietaris vegnan concedids da la confederaziun independentamain, senza participaziun dal chantun. Las contribuziuns à fonds perdu vegnan augmentadas dal chantun, sche er la vischnanca, en la quala sa chatta l'object, conceda contribuziuns. Il chantun paja contribuziuns supplementaras durant maximalmain 10 onns. Las ultimas contribuziuns supplementaras vegnan pajadas dal chantun l'onn 2012. La confederaziun po pajar sias contribuziuns durant maximalmain 25 onns.
Lescha federala davart la promoziun da la construcziun d'abitaziuns e da la proprietad (LCAP)
Ils agids federals tenor la LCAP èn anc vegnids purschids fin la fin da l'onn 2001.
Las fatschentas ch'eran gia vegnidas concludidas vegnan cuntinuadas senza midadas. Midadas da las relaziuns persunalas e finanzialas ston vegnir annunziadas a nus, er tut las midadas da locatarias e da locataris en las abitaziuns subvenziunadas.
Agids federals (LPrA)
Il 1. d'october 2003 è entrada en vigur la nova lescha federala dals 21 da mars 2003 davart la promoziun d'abitaziuns a tschains u a pretschs moderads (lescha davart la promoziun d'abitaziuns, LPrA).
Sa basond sin la LPrA po la confederaziun promover la construcziun u la renovaziun d'abitaziuns da locaziun per chasadas cun pitschnas entradas, l'access a la proprietad d'abitar, las activitads da las organisaziuns d'utilitad publica che construeschan abitaziuns sco er la perscrutaziun en il sectur da las abitaziuns.
Per la promoziun èn previs agids directs ed indirects. En il rom dal "program da distgargia per las finanzas federalas 2003" èn ils emprests da daners che vegnan concedids directamain da la confederaziun, vegnids sistids fin la fin da l'onn 2008. Il favrer 2007 ha il cussegl federal concludì da proponer al parlament da reintegrar meds finanzials per l'agid indirect en il plan da finanzas, e quai a partir da l'onn 2009. Ad emprests directs da la confederaziun duai dentant vegnir renunzià definitivamain.
Ulteriuras infurmaziuns
Sco incarica da prestaziun da l'uffizi federal d'abitaziuns maina l'associaziun svizra per las abitaziuns (ASA) cun sedia a Turitg in center da cumpetenza per la construcziun d'abitaziuns cooperativas. Sias var 1'000 commembras – en emprima lingia associaziuns, ma er fundaziuns, singulas societads anonimas d'utilitad publica e vischnancas – promova ella cun servetschs da tut gener sco cussegliaziuns, finanziaziuns, statuts, la revista spezialisada "Wohnen" e curs da furmaziun supplementara. Ella represchenta lur interess e furma ina rait che cuvra l'entira Svizra. Dapi ch'ella è vegnida fundada, è la ASA colliada cun la confederaziun, cun ils chantuns e cun las vischnancas tras in partenadi ch'è sa cumprovà. Da las prestaziuns da la construcziun d'abitaziuns cooperativas profitescha la finala l'entira populaziun.