L'uffizi per il svilup dal territori (ARE) è in post da servetsch da l'administraziun chantunala dal Grischun. Ses champ d'activitad pertutga tut las dumondas specificas da la planificaziun dal territori e dal svilup dal territori sin plaun chantunal, regiunal e communal. Plinavant collavura il ARE tar planisaziuns interchantunalas, naziunalas e transcunfinalas, sche quellas pertutgan directamain u indirectamain il territori u ils interess specifics dal chantun Grischun. En sia lavur tschertga il ARE adina in stretg contact cun ses partenaris e cun sia clientella.
Il ARE drizza sia lavur tenor il model directiv. El vul consolidar sia posiziun sco center da cumpetenza en dumondas da la planificaziun dal territori per sa manifestar en la discussiun davart tut las activitads cun in effect sin il territori e per pudair porscher prestaziuns da servetsch optimalas a sias partenarias e ses partenaris sco er a sia clientella.
Il ARE vegn confruntà permanentamain cun las stentas per mantegnair e furmar il spazi vital. En sia activitad ha el l'intenziun da mantegnair e d'augmentar la qualitad da viver. El sustegna e dirigia il svilup dal territori ed ha en quest connex quità che las resursas vegnian duvradas en moda persistenta. Il ARE tschertga ina consideraziun globala, ina ponderaziun adequata ed ina procedura da decisiun equilibrada e legitimada democraticamain. Per quest intent vul il ARE cuntanscher in svilup dal territori ch'è adattà a la multifariadad culturala, natirala ed economica.
Planisaziun d'utilisaziun
En la partiziun da la planisaziun d'utilisaziun lavuran totalmain 8 collavuraturas e collavuraturs. Las emploiadas ed ils emploiads s'occupan – en territoris determinads geograficamain (circuls da planisaziun) – prioritarmain da dumondas specificas da la planisaziun communala d'utilisaziun e da la procedura da la permissiun da construcziun per edifizis e stabiliments ordaifer la zona da construcziun (procedura EOZ). Ultra da quai surpiglian els differentas incumbensas spezialas; uschia vegnan giuditgads ed accumpagnads projects tenor dretg spezial, elavurada la basa, persequitads ils svilups dal territori sco er concepidas las visiuns, las acziuns u las planisaziuns areguard il svilup dal territori giavischabel.
Las collavuraturas ed ils collavuraturs adempleschan – correspundentamain a lur atgnas enconuschientschas preliminaras, a lur preferenzas ed a lur interess – funcziuns da stab (collavuraziun da stab) en secturs specifics determinads e valan uschia sco persunas da contact per dumondas specificas tant a l'intern sco er a l'extern.
Las collavuraturas ed ils collavuraturs da la partiziun da la planisaziun d'utilisaziun tgiran in contact direct ed uschè intensiv sco pussaivel cun las autoritads communalas, cun las autoritads da construcziun communalas sco er – en enclegientscha cun la vischnanca cumpetenta – er cun las gruppas d'interess privatas. La funcziun consultativa vegn fatga en emprima lingia per l'administraziun chantunala e per las autoritads communalas.
Grazia a la moda da lavurar orientada al team vegn da princip garantida la substituziun vicendaivla en ils champs da lavur centrals.
Planisaziun directiva e basa
En il team da la planisaziun directiva e da la basa lavuran trais collavuraturs; dus en la planisaziun directiva, in tar la basa.
La planisaziun directiva s'occupa da dumondas dal svilup surcommunal e da la planisaziun e coordinaziun surlocala. Partind da tematicas relevantas per il spazi vegn mussà il svilup dal territori ch'ins vul cuntanscher il futur. Il tractament dals differents interess envers noss spazi vital (p.ex. economia, turissem, traffic, natira, cuntrada, societad) vegn determinà cun finamiras, prioritads e ponderaziuns principalas ed il proceder vegn coordinà. En il plan directiv chantunal (PDChant 2000) fixescha la regenza la politica chantunala da planificaziun dal territori.
En il chantun Grischun è la planisaziun directiva ina incumbensa communabla dal chantun e da las regiuns. Ils temas da la planisaziun directiva chantunala sa drizzan tenor las disposiziuns e directivas legalas respectivas sco er tenor ils interess spezials da la politica chantunala da planificaziun dal territori. Ils temas da la planisaziun directiva chantunala resultan d'ina vart dals secturs da responsabladad ch'èn fixads en il plan directiv chantunal e dals quals las regiuns han la direcziun. Da l'autra vart resultan ils temas da la responsabladad locala da las regiuns per il territori, per il qual ellas han la responsabladad tenor la constituziun chantunala ed il PDChant 2000. En il sectur dal svilup dal territori regiunal garantin nus ina collavuraziun collegiala tranter las regiuns. Nus assistin ed accumpagnain er l'elavuraziun da programs d'aglomeraziun e da projects regiunals.
En il sectur da la basa vegn persequità ed analisà il svilup dal territori. Qua sa tracti d'observar il svilup dal territori (observaziun dal spazi) e d'analisar las forzas che han chaschunà quest svilup. Da quai pon ins obtegnair las enconuschientschas che dattan la pussaivladad d'influenzar il svilup futur dal territori en la direcziun giavischada. Er raits e programs internaziunals pertutgan il champ da lavur da la 'basa'.
Las posiziuns davart planisaziuns secturialas e da ressort (confederaziun, chantun, regiun) sco er davart leschas (confederaziun, chantun) ch'èn relevantas per il svilup surordinà dal territori vegnan medemamain elavuradas da la partiziun dal plan directiv e da la basa.
Nossas partenarias e noss partenaris èn primarmain las 15 organisaziuns da la planisaziun regiunala, las autoritads communalas, auters posts da l'administraziun sin plaun federal e chantunal, federaziuns ed organisaziuns. Nus appreziain e tgirain il contact direct ed il bun barat d'ideas che nus avain stabilì ensemen cun nossas partenarias e noss partenaris.
La substituziun vicendaivla en in champ d'activitad varià vegn garantida – pervia dal pitschen dumber da collavuraturas e da collavuraturs – unicamain a la basa d'infurmaziun; sin il champ operativ n'èn substituziuns – per motivs da capacitad – betg pussaivlas.
Servetsch giuridic e stab
En il servetsch giuridic lavuran il manader dal servetsch giuridic ed ina praticanta giuridica. Tar ses champ d'incumbensas tutga primarmain l'elavuraziun da tut las dumondas dal dretg da construcziun e da planisaziun per l'uffizi per il svilup dal territori sco er la cussegliaziun giuridica cumplessiva a l'uffizi ed a sia represchentanza vers l'exteriur pertutgant interess giuridics.
Las incumbensas centralas èn – en la procedura per la permissiun da construcziun per edifizis e stabiliments ordaifer la zona da construcziun (procedura EOZ) – la cussegliaziun giuridica da las vischnancas sco er da las petentas e dals petents d'ina dumonda da construcziun e l'examinaziun sco er la decisiun davart talas dumondas en la funcziun d'ina autoritad directiva. En cas da recurs redigia il servetsch giuridic plinavant consultaziuns per mauns da la dretgira administrativa e per mauns dal tribunal federal e fa part da las inspecziuns respectivas al lieu. Ultra da quai edescha il servetsch giuridic la basa necessaria per l'execuziun dal dretg ed è responsabel per la publicaziun adattada da quella, el piglia posiziun davart ils projects da lescha da la confederaziun resp. d'auters departaments ed uffizis e cooperescha en lavurs legislativas resp. en projects interns. En la procedura da permissiun per l'installaziun d'antennas da telefonia mobila ordaifer las zonas da construcziun garantescha il servetsch giuridic sco post da coordinaziun chantunal en spezial la creaziun d'ina rait per telefonia mobila en il Grischun che correspunda al basegn e ch'è ecologica.
Il servetsch da stab iniziescha, maina ed elavura projects spezials (er projects da perscrutaziun) sin plaun regiunal, chantunal e transcunfinal, en ils secturs svilup dal territori, abitadi, cuntrada, turissem e traffic. En quest connex collavura el, tut tenor la dumonda fatga, stretgamain cun las partiziuns respectivas, cun auters uffizis e cun circuls externs. Plinavant vegnan tgirads dossiers sco "allianza en las Alps", svilup persistent e dumondas da princip. Entaifer l'uffizi è il post cumpetent cunzunt per las mesiras per realisar il model directiv, sco er per l'organisaziun e la promoziun dal colloqui dal ARE.
Informatica, SIG e tecnica
En il team tecnic lavuran tschintg persunas. El promova en emprima lingia la moda da lavurar digitala en la planisaziun dal territori. Ils documents da la planisaziun dal territori (plans e texts) vegnan transferids pass per pass, tenor in concept general, en ina furma digitala standardisada. Per quest intent vegnan elavurads, integrond ils partenaris pertutgads, models da datas per la planisaziun d'utilisaziun e per la planisaziun directiva. Els han la funcziun da quasi-standards en il chantun e dattan la pussaivladad da barattar uschia datas tranter tut las participadas e tut ils participads (vischnancas, regiuns, planisaders e planisadras dal territori, uffizis). Plinavant è el responsabel, ensemen cun ils servetschs administrativs, per il support d'informatica da l'uffizi.
Las incumbensas graficas e conceptualas vegnan ademplidas dal biro tecnic. El è responsabel per il layout da nossas publicaziuns sco p.ex. da noss fegl d'infurmaziun infoARE sco er per il mantegniment e per la tgira da nossas paginas d'internet.
Servetschs administrativs
Ils servetschs administrativs sa structureschan en ils dus secturs principals "secretariat" e "contabilitad".
Il team dal secretariat consista da trais secretarias e da trais documentalistas. Ellas dattan infurmaziun ed etableschan il contact cun ils posts cumpetents dal ARE. Ellas elavuran, administreschan ed archiveschan la basa da decisiun sco er ulteriurs meds d'infurmaziun e meds auxiliars.
Il schef da servetsch maina e coordinescha las incumbensas dals servetschs administrativs. El fa il quint administrativ (preventiv/quint) dal ARE e surveglia ils fatgs da subvenziun (contribuziuns federalas a la planisaziun directiva chantunala sco er contribuziuns chantunalas a la planisaziun directiva regiunala ed a la planisaziun d'utilisaziun communala). Sco commember dal team IT e sco responsabel per la EED tgira el a medem temp la rait locala e sustegna il persunal tar l'applicaziun dals meds d'informatica.